Teksti i plotë i marrëveshjes së përfolur gjerësisht mes Shteteve të Bashkuara dhe Iranit, që synon t’i japë fund përplasjes mes dy vendeve, ende nuk është bërë publik zyrtarisht. Megjithatë, CNN thotë se ka siguruar një kopje të dokumentit nga një zyrtar amerikan.
Përmbajtja e memorandumit është konfirmuar edhe nga një diplomat që pati mundësi ta shihte atë gjatë samitit të G7 në Francë. Të njëjtin verifikim, sipas raportimit, e kanë bërë edhe dy burime të tjera diplomatike që janë në dijeni të negociatave. Ndonëse administrata Trump është përpjekur ta paraqesë këtë si një fitore, dyshimet që e shoqëruan marrëveshjen duket se po shtohen. BBC vëren se pakti parashikon angazhimin e miliarda dollarëve për Iranin, rikthen në tavolinë negociatorët bërthamorë dhe mundëson kalimin në Ngushticën e Hormuzit, njësoj si 24 orë përpara se SHBA dhe Izraeli të hynin në luftë.
Të lidhura
None found
Sipas zyrtarëve amerikanë të cituar nga CNN, memorandumi konsiderohet një “dokument politik” dhe nuk përfshin angazhimet sekrete më të rëndësishme që Irani i ka marrë ndaj SHBA-së, sidomos sa i takon programit bërthamor. Nënshkrimi zyrtar i tij pritet të bëhet të premten, çka do të hapë një periudhë 60-ditore për negociimin e kushteve përfundimtare. Këto janë 14 pikat që përmban marrëveshja:
Pika 1: Me nënshkrimin e këtij Memorandumi të Mirëkuptimit, Republika Islamike e Iranit dhe Shtetet e Bashkuara, bashkë me aleatët e tyre në luftën aktuale, shpallin fundin e menjëhershëm dhe të përhershëm të luftës në të gjitha frontet, përfshirë Libanin, dhe marrin përsipër që prej këtij momenti të mos kryejnë veprime armiqësore ndaj njëra-tjetrës, si edhe të mos përdorin apo kërcënojnë me forcë kundër njëra-tjetrës.
Pika 2: Të dyja palët zotohen të respektojnë sovranitetin dhe integritetin territorial të njëra-tjetrës, si dhe të mos përzihen në çështjet e brendshme.
Pika 3: SHBA dhe Irani bien dakord që brenda 60 ditësh të negociojnë dhe të arrijnë një marrëveshje përfundimtare, me mundësinë e shtyrjes së këtij afati nëse ka pëlqim të ndërsjellë.
Pika 4: Menjëherë pas firmosjes, Shtetet e Bashkuara do të heqin bllokadën detare dhe do të ndalin çdo pengesë ndaj Iranit, duke rikthyer lëvizjen detare në kapacitet të plotë brenda 30 ditësh, në raport me volumin që ekzistonte para luftës. Po ashtu, SHBA angazhohet të tërheqë forcat e veta nga zonat përreth brenda 30 ditëve pas arritjes së marrëveshjes përfundimtare.
Pika 5: Irani merr përsipër që menjëherë të garantojë rifillimin e qarkullimit të anijeve tregtare nga Gjiri Persik drejt Detit të Omanit dhe në drejtimin e kundërt brenda 30 ditësh, duke pasur parasysh heqjen e pengesave teknike dhe neutralizimin e minave.
Pika 6: Shtetet e Bashkuara, në bashkëpunim me partnerët rajonalë, angazhohen të hartojnë një plan të plotë për rehabilitimin dhe zhvillimin ekonomik të Iranit, me një financim minimal prej 300 miliardë dollarësh. Mënyra e zbatimit të këtij plani do të përcaktohet brenda 60 ditësh.
Pika 7: SHBA zotohet të heqë të gjitha kategoritë e sanksioneve kundër Iranit, përfshirë rezolutat e OKB-së dhe të IAEA-s, si edhe sanksionet amerikane, sipas një kalendari që do të përcaktohet në marrëveshjen përfundimtare.
Pika 8: Irani rithekson zotimin se nuk do të prodhojë kurrë armë bërthamore. Të dyja palët bien dakord që çështja e materialit të pasuruar dhe të gjitha temat e tjera që lidhen me programin bërthamor të trajtohen në marrëveshjen përfundimtare.
Pika 9: Deri në arritjen e ujdisë finale, do të ruhet status quo-ja: Irani do ta mbajë programin e tij bërthamor në gjendjen aktuale, ndërsa SHBA nuk do të vendosë sanksione të reja dhe nuk do të shtojë praninë ushtarake në rajon.
Pika 10: Deri në datën e heqjes së sanksioneve, SHBA do të japë leje të posaçme për eksportin e naftës iraniane, produkteve petrokimike dhe shërbimeve të lidhura me to, si bankat, sigurimet dhe transporti.
Pika 11: Shtetet e Bashkuara angazhohen të zhbllokojnë fondet dhe asetet e ngrira të Iranit dhe t’i bëjnë ato plotësisht të përdorshme, sipas mekanizmave të Bankës Qendrore të Iranit.
Pika 12: Palët do të krijojnë një mekanizëm zbatimi që do të mbikëqyrë marrëveshjen përfundimtare dhe angazhimet e ardhshme.
Pika 13: Pas nënshkrimit dhe konfirmimit të fillimit të zbatimit të neneve 4, 5, 10 dhe 11, palët do të ulen në negociata për marrëveshjen përfundimtare vetëm për nenet e mbetura.
Pika 14: Marrëveshja përfundimtare do të miratohet përmes një rezolute detyruese të Këshillit të Sigurimit të OKB-së.
