Në samitin e G7-ës që po mbahet në Evian të Francës, presidenti i Ukrainës, Volodymyr Zelensky, mori pjesë dhe pati një bisedë të shkurtër me presidentin amerikan Donald Trump.
Sipas një fotografie të publikuar nga presidenca ukrainase, dy liderët shihen pranë njëri-tjetrit në tryezën e samitit. Në një tjetër imazh shfaqet edhe Sekretari i Shtetit i SHBA-së, Marco Rubio, së bashku me Zelenskyn dhe Trumpin.
Të lidhura
None found
Përpara këtij momenti, liderët ishin pritur nga organizatori i samitit, presidenti francez Emmanuel Macron.
Ky është takimi i parë ballë për ballë mes dy udhëheqësve pas shumë muajsh. Që prej përplasjes së tyre të fortë në Shtëpinë e Bardhë në shkurt 2025, kontaktet e mëvonshme mes tyre kanë qenë më të rezervuara, si në Shtëpinë e Bardhë, ashtu edhe në Vatikan gjatë funeralit të Papa Françeskut.
Në një reagim të bërë në rrjetet sociale, Zelensky tha se ishte i kënaqur me diskutimin konstruktiv mes liderëve të G7 dhe Ukrainës. Ai falënderoi homologët e tij për kohën që i kushtuan këtë mëngjes dhe për “propozimet e forta se si ta detyrojnë Rusinë të bëjë paqe”.
“Prioritetet janë të qarta, më shumë raketa mbrojtëse ajrore së bashku me licenca për prodhimin e tyre, një paketë mbështetjeje dimërore dhe rritje e presionit ndaj Rusisë. Është e rëndësishme që Shtetet e Bashkuara të jenë të gatshme të ofrojnë mbështetje në të gjitha këto fusha veprimi. Është jetike që gjithçka që është diskutuar të zbatohet. Rusia duhet të kuptojë se lufta e saj nuk do të pranohet kurrë. Faleminderit të gjithëve që po ndihmojnë”, shkroi ai.
