Dallgët e forta i morën përpara, këta janë të rinjtë nga Kosova që u mbytën në Shëngjin

Ditën e djeshme, një ngjarje e rëndë tronditi Kosovën dhe Shqipërinë, pasi dy të rinj nga Kosova humbën jetën tragjikisht në plazhin e Ranës së Hedhun në Shëngjin. Ata u rrëmbyen nga dallgët e forta, e si pasojë dy prej tyre humbën jetën, ndërsa dy të tjerë përfunduan në spital në gjendje të rëndë shëndetësore.

Viktimat janë Leonit Aliu, 21-vjeç, dhe Jetmir Binaku, 22-vjeç, të cilët ditën e djeshme kishin hyrë në det për t’u larë së bashku me tre bashkëmoshatarë të tjerë.

Të lidhura

Ngjarje e rëndë në Shëngjin/ Katër të rinj u morën nga dallgët, mbyten 2 prej tyre, 2 të tjerë në gjendje të rëndë

Tragjedia me dy të mbytur në Shëngjin, reagon policia e Lezhës: 5 të rinj nga Kosova u futën në det për t’u larë, por u morën nga dallgët

Sipas informacioneve paraprake, grupi u përball me një rrymë të fortë detare që i mori përpara, duke shkaktuar tragjedinë.

  Leonit Aliu, 21-vjeç

Pavarësisht përpjekjeve për t’i nxjerrë dhe për t’u ardhur në ndihmë, Leonit Aliu dhe Jetmir Binaku, nuk arritën të mbijetonin.

Ndërkohë, tre të rinjtë e tjerë që ndodheshin me ta mbetën të lënduar dhe morën ndihmën e nevojshme mjekësore.

          Jetmir Binaku, 22-vjeç

Leonit Aliu, ishte i njohur edhe në sport, pasi në të kaluarën kishte qenë pjesë e ekipit të futbollit KF Fushë Kosova.

Ndërsa Jetmir Binaku, ishte me origjinë nga fshati Gllobar i Drenasit.

Kjo ngjarje e rëndë ka tronditur familjarët, miqtë dhe mbarë opinionin publik, duke lënë pas dhimbje të madhe në të dyja anët e kufirit.