Procesi për zgjedhjen e kryetarit të Partia Demokratike e Shqipërisë ka hyrë në një fazë vendimtare, teksa Kryesia sot ka shqyrtuar dhe miratuar raportin e Komisionit të Organizimit dhe Kontrollit të Operacioneve Elektorale (KOKOE) mbi kandidaturat për garën e 23 majit.
Në një deklaratë për mediat, sekretari për çështjet ligjore në PD, Ivi Kaso, bëri të ditur se Kryesia u njoh me tre aplikime zyrtare të konsideruara të vlefshme nga KOKOE, të cilat përmbushnin kushtin bazë të anëtarësisë në parti.
Të lidhura
None found
Ai sqaroi se përveç kreut aktual Sali Berisha, kandidaturat e paraqitura nga Mereme Sela dhe Vladimir Mulaj u shqyrtuan në mënyrë të detajuar, por nuk arritën të plotësojnë të gjitha kriteret e përcaktuara në vendimmarrjen e datës 18 mars 2026.
Sipas Kasos, kriteret përfshijnë jo vetëm qenien anëtar i Partisë Demokratike, por edhe eksperiencë të konsiderueshme drejtuese në strukturat qendrore dhe vendore të partisë, si dhe përmbushjen e standardeve të integritetit në përputhje me legjislacionin në fuqi.
Deklarata:
“Komisioni njëzëri vlerësoi se zoti Berisha i plotësonte të treja këto kritere, ndërkohë që dy kandidatët e tjerë, pavarësisht se plotësonin kushtin e të qenit anëtarë të Partisë Demokratike, si zonja Sela dhe zoti Mulaj, nuk plotësonin kriteret e tjera përsa i përket eksperiencës së tyre drejtuese në strukturat qendrore dhe vendore të Partisë Demokratike për një periudhë 10-vjeçare, dhe për këtë arsye u konsideruan të papërshtatshme nga KOKOE-ja dhe u konsideruan gjithashtu të papërshtatshme dhe nga kryesia e Partisë Demokratike për të garuar”, tha Kaso.
Pyetje: Ditën e djeshme zonja Sela ka dërguar në gjykatë shkresat për të cilat nuk është pranuar këtu nga selia e Partisë Demokratike për të kandiduar. Keni një koment për këtë?
Ivi Kaso: Nuk është pranuar për të kandiduar, ju referojeni vendimmarrjes e cila nuk e ka kualifikuar. Unë besoj që vendimi i KOKOE-s është i qartë dhe i arsyetuar.
Ndalet në rastin e zonjës Sela, e cila siç KOKOE e ka vërejtur dhe ka shqyrtuar, plotëson vetëm një kriter nga ato të përcaktuara në vendimmarrjen e datës 18.03, pra vetëm kriterin e anëtarësisë.
As nga pikëpamja formale dokumentacioni i zonjës Sela nuk ishte i plotë, pasi i mungonte dhe kriteri tjetër thelbësor, pra paraqitja e formularit të dekriminalizimit, të cilin zonja nuk e ka paraqitur pranë Partisë Demokratike, por tutje asaj, për shkak se nuk plotësonte kriterin themelor, atë të një figure me eksperiencë drejtuese 10, të paktën 10 vjeçare në strukturat e larta drejtuese të Partisë Demokratike, automatikisht ka pasjellë skualifikimin e kësaj zonje.
Sigurisht statuti parashikon edhe mënyrat në të cilat ankohet ndaj kësaj vendimmarrje kushdo i interesuar që është bërë pjesë e garës, dhe sigurisht ankimimi i drejtpërsëdrejti në gjykatë, në qoftë se është kjo që ka ndodhur, nuk është rruga e duhur statutore, pasi statuti parashikon që në këto raste ankimimi i drejtohet së pari gjykatës së partisë dhe mbas ezaurimit të kësaj rruge administrative, eventualisht çështja mund të bëhet objekt shqyrtimi edhe gjyqësor. Por besoj që në këtë rast jo vetëm statuti, por edhe kriteret e vendosura dhe transparenca që ka bërë KOKOE në vendimmarrjen e saj përsa i përket kësaj zonje, lë pak vend për diskutim.
