Kreu i grupit parlamentar të PD-së Gazment Bardhi, ka reaguar ashpër ndaj një mesazhi në whatsapp që mendohet se i përket ministrit për Evropën dhe Punët e Jashtme, Ferit Hoxha, duke e cilësuar atë si “skandaloze dhe fyese” ndaj shqiptarëve në Maqedoninë e Veriut.
Në një komunikim në një grup whatsapp, një fjali me përmbajtje fyese ndaj shqiptarëve në Maqedoninë e Veriut:
“Po ata idiotët shqiptarë atje çfarë thonë?”
Të lidhura
None found
Mesazhi vjen në kontekstin e një diskutimi ku përmendet edhe një shkrim i gazetës “Nova Makedonija” lidhur me një deklaratë të kryeministrit Edi Rama
Bardhi dënon përdorimin e gjuhës që, sipas tij, i referohet shqiptarëve si “idiotë”, duke e konsideruar këtë qëndrim të papranueshëm për një zyrtar të lartë të shtetit.
Ai shton se një gjuhë e tillë bie ndesh me Kushtetutën e Republikës së Shqipërisë dhe kujton retorika të së kaluarës kundër shqiptarëve, duke përmendur figura historike si Nikola Pašić dhe Vasa Čubrilović.
Në përfundim, Bardhi kërkon dorëheqjen e menjëhershme të ministrit Hoxha, duke theksuar se çdo vonesë është e pajustifikueshme. Ai i bën thirrje gjithashtu kryeministrit Rama që ta shkarkojë pa hezitim dhe të distancohet publikisht nga kjo deklaratë, të cilën e cilëson si fyerje për shqiptarët dhe njollë për Republikën e Shqipërisë.
Postimi i Bardhit:
Dënoj me forcën më të madhe dhe pa asnjë ekuivok deklaratën skandaloze dhe fyese të Ministrit për Europën dhe Punët e Jashtme, Ferit Hoxha, drejtuar shqiptarëve në Maqedoninë e Veriut.
Është e papranueshme dhe e patolerueshme që një zyrtar i lartë publik t’u referohet shqiptarëve si “idiotë”. Një qëndrim i tillë e përjashton menjëherë nga çdo funksion publik dhe e bën të pamundur vijimin e ushtrimit të detyrës, qoftë edhe për një minutë më shumë. Aq më tepër kur bëhet fjalë për ministrin përgjegjës për përfaqësimin e Shqipërisë në arenën ndërkombëtare.
Kjo gjuhë e papërgjegjshme dhe denigruese jo vetëm që cenon rëndë dinjitetin e shqiptarëve, por krijon bindjen se kemi të bëjmë me një përfaqësues që flet në frymën e propagandës së huaj dhe jo në interes të Republikës së Shqipërisë. Kjo deklaratë është e denjë vetëm për Nikolla Pashiqin apo Vasa Çubrilloviç.
Një retorikë e tillë bie haptazi ndesh me nenin 8 të Kushtetutës së Republikës së Shqipërisë.
Ferit Hoxha duhet të japë menjëherë dorëheqjen. Çdo vonesë është e pajustifikueshme. Kryeministri ka detyrimin politik dhe institucional ta shkarkojë pa asnjë hezitim dhe të distancohet publikisht dhe qartë nga kjo gjuhë fyese dhe e papranueshme, që të kujton retorika të errëta të së kaluarës kundër shqiptarëve.
Çdo minutë më shumë në detyrë është një fyerje për shqiptarët dhe një njollë për Republikën e Shqipërisë.
