Ola Xama, e ftuar në emisionin “Të Paekspozuarit” në MCN TV, ka folur për vjedhjen e informacioneve nga email-et e prokurorëve të SPAK.
Xama tha se ka një mungesë të madhe transparence nga SPAK se çfarë ka ndodhur dhe ngjarja nuk u raportuar fare për tre javë. Ndërkohë, Xama tha se SPAK lejon publikimin e materialeve që përbëjnë sekret hetimor kur i intereson dhe e ruan këtë sekret po kur i intereson vetë, duke marrë “monopolin e të vërtetës”.
“Janë arrestuar dy persona dhe merret vesh që janë arrestuar dy javë më pas. Standardi i njoftimeve, është që brenda 24-48 orë del njoftimi për shtyp nëse ka masë arrest me burg. Ka një njoftim pa akuzë dhe as për çfarë dyshohen këta persona. Çdo gjë e zezë, askush nuk merr vesh asgjë. Kjo lidhet me standartet e reputacionit dhe besueshmërisë.
Shoh edhe një problem tjetër, nëse sistemet e prokurorisë janë kaq të dobëta sa nuk janë ndryshuar password-et, sa herë mund të ketë ndodhur të jenë aksesuar kompjuterat dhe email-et? Sa materiale janë siguruar dhe janë përdorur për të shantazhuar dhe për lojë mafioze?
SPAK merr në dorë edhe monopolin e të vërtetës që vendos se çfarë mund të publikohet dhe çfarë jo. Nëse rrjedhin informacione dhe gazetari vlerëson se ka interes publik, gazetari është i lirë t’i thotë. Shoh intimidim të gazetarëve. Kanë frikë të përmendin se cili është politikani që dyshohet se ka përdorur ata dy persona për të hakeruar.
Sa materiale hetimore të SPAK kanë dalë? Doli dosja e Artan Hoxhës, e shpallën fajtor pa e gjykuar dhe SPAK nuk kishte problem për sekret hetimor. Kjo çështje ku implikohet SPAK, nuk del gjë. Nuk ka monopolin e së vërtets SPAK”, tha Xama.
