Presidenti francez Emmanuel Macron mirëpriti të mërkurën në mbrëmje në Paris homologun e tij ukrainas, Volodymyr Zelenskyy, për të përgatitur samitin e “Koalicionit të Vullnetit”, një nismë e vendeve të gatshme për t’i siguruar Ukrainës garanci afatgjata sigurie.
Gjatë konferencës për shtyp, Macron njoftoi një ndihmë ushtarake shtesë prej 2 miliardë eurosh për Kievin.
Të lidhura
None found
Paketa përfshin raketa antitank Milano, raketa ajrore MICA dhe Mistral, automjete të blinduara, municione dhe dronë.
Samiti i së enjtes në Paris do të diskutojë forcimin e ushtrisë ukrainase dhe mundësinë e vendosjes së trupave paqeruajtëse.
Macron sqaroi se ato nuk do të angazhohen në vijën e frontit, por mund të vendosen në “qytete strategjike” ose “baza” për të mbështetur sigurinë afatgjatë të vendit.
Zelenskyy theksoi rëndësinë e mbështetjes amerikane, duke shpresuar në angazhimin e SHBA-së për një armëpushim të pjesshëm.
Sakaq, Moska ka deklaruar se do ta respektojë armëpushimin vetëm nëse hiqen sanksionet ndaj saj, kërkesë që Macron e refuzoi duke theksuar se Rusia duhet të respektojë ligjin ndërkombëtar përpara çdo lehtësimi.
Samiti në Paris pritet të sjellë diskutime kyçe mbi të ardhmen e sigurisë së Ukrainës dhe mbështetjen ndërkombëtare ndaj saj.
