Pjesa më e madhe e Shteteve të Bashkuara lindore u godit nga stuhi të forta dje, të hënën, të cilat vranë të paktën dy persona, ndërsa qindra mijëra banorë janë pa energji elektrike dhe mijëra fluturime u anuluan ose u vonuan.
Shiu, erërat e forta dhe breshri goditi pothuajse të gjithë Bregun Lindor të SHBA-së, nga Alabama në Nju Jork, ku Shërbimi Kombëtar i Motit lëshoi një paralajmërim për tornado për miliona njerëz.
Shërbimi Kombëtar i Motit (NWS) parashikoi një “rrezik të moderuar” të stuhive të rrezikshme, me erëra që mund të tejkalojnë 128 km/h.
“Jini të vetëdijshëm për kushtet e motit dhe sigurohuni që të jeni në gjendje të merrni paralajmërime”, kishte këshilluar NWS e Baltimore dhe Uashington përmes mediave sociale më herët gjatë ditës.
Shumica e rreziqeve ekstreme të motit ishin ulur në mbrëmje (koha lokale) dhe disa rajone u përballën me kërcënime nga përmbytjet ndërsa shiu vazhdonte.
Breshëri me një diametër prej 11.5 centimetra është raportuar në Virxhinia, tha NWS.
Në Alabama, një 28-vjeçar vdiq pasi u godit nga rrufeja në parkingun e një parku industrial, raportoi stacioni lokal i rrjetit ABC.
Në Karolinën e Jugut, një djalë 15-vjeçar u vra nga një pemë që binte para shtëpisë së gjyshërve të tij, sipas një stacioni lokal CBS.
Mbrëmë vonë, më shumë se 700,000 njerëz ishin pa energji elektrike në Bregun Lindor, sipas faqes së internetit poweroutage.us.
Më shumë se 1700 fluturime u anuluan në SHBA dhe më shumë se 8000 u vonuan për shkak të motit të keq.
Në Uashington, agjencitë federale dërguan punëtorët në shtëpi në orën 15:00 për shkak të parashikimit të stuhisë.
Stuhitë goditën pjesën më të madhe të Shteteve të Bashkuara të Amerikës jugore, kryesisht në Teksas, Luiziana dhe Florida, ku deri më sot ishin lëshuar paralajmërime për të nxehtit me temperatura deri në 42 gradë Celsius.
Sipas shkencëtarëve, ndryshimet klimatike kanë rritur intensitetin dhe shpeshtësinë e ngjarjeve ekstreme të motit në botë.
