Më 15 nëntor, mijëra besimtarë dolën në rrugët e Cuscos për të përshëndetur Papa Leonin XIV gjatë vizitës së tij në Peru. Qyteti historik ndodhet mbi 3 mijë metra mbi nivelin e detit, në rajonin ku dikur lulëzoi qytetërimi Inka.
Menjëherë pas mbërritjes, Papa përshëndeti nga makina papale turmën që e shoqëroi gjatë kalimit nëpër qytet. Besimtarët mbanin flamuj të Vatikanit dhe të Perusë, tullumbace të bardha e të verdha, fotografi, simbole dhe lodra prej pelushi me figurën e tij. Pritja e ngrohtë dhe entuziazmi i qytetarëve e emocionuan sërish kreun e Kishës Katolike.
Të lidhura
None found
Në Cusco, Papa u takua me besimtarë dhe përfaqësues të devocionit popullor në parkun arkeologjik kombëtar të Saqsaywamanit. Ai vlerësoi rëndësinë historike dhe shpirtërore të vendit, duke e përshkruar bukurinë e tij si të pamohueshme dhe Saqsaywamanin si një altar guri që ngrihet drejt qiellit të Andeve, aty ku të lashtët kërkonin hyjnoren.
Leoni XIV foli edhe për ruajtjen e traditave popullore, të cilat i cilësoi pasuri të çmuar për brezat e rinj. Sipas tij, të rinjtë duhet të marrin pjesë më shumë në veprimtaritë e komunitetit, ndërsa kontributi i tyre duhet dëgjuar, vlerësuar dhe mbështetur.
Një tjetër moment i vizitës ishte lutja e Engjëllit të Zotit në Bazilikën Katedrale të Fjetjes së Virgjëreshës Mari në Cusco. Aty Papa dhuroi një pëlhurë të shenjtë, të njohur si sudarium, të cilën e quajti një përkëdhelje simbolike për një popull që përballon vuajtjet me dinjitet dhe shpresë të krishterë.
Në mesazhin e tij, ai iu drejtua edhe atyre që vuajnë nga sëmundje fizike e shpirtërore. Papa e quajti të pavërtetë mendimin se sëmundja ia pakëson vlerën njeriut, duke thënë se, kur përjetohet me besim, ajo mund të kthehet në një mundësi për t’u rritur në dashuri dhe për ta ndarë atë me të tjerët.
Leoni XIV kujtoi tërmetin e fuqishëm të vitit 1650, që solli shkatërrime dhe panik në Cusco. Ai përmendi figurën e quajtur “Zoti i Tërmeteve” (Señor de los Temblores), kryqin e zi që nderohet në Katedralen e qytetit dhe konsiderohet mbrojtësi i tij shpirtëror.
Tradita vendase tregon se kjo figurë e shenjtë u nxor në rrugë gjatë tërmetit dhe se më pas lëkundjet u ndalën në mënyrë të mrekullueshme. Papa tha se, që prej asaj kohe, banorët e Cuscos dhe të gjithë Perusë e shohin Taytachën si strehë të sigurt përballë çdo stuhie dhe si mbështetje të fortë mes tronditjeve të historisë. Pëlhura që ai dhuroi do të vendoset mbi kryqin e shenjtë, duke pasur një domethënie të veçantë për besimtarët vendas.
Pas ndalesës në Saqsaywaman, udhëtimi i Papës vijoi drejt Pucallpës, në brigjet e lumit Ucayali, në zemër të pyllit tropikal të Amazonës. Programi i tij atje përfshin takime me misionarë, misionare dhe përfaqësues të komuniteteve indigjene.
Gjatë vizitës në Amazonë, Leoni XIV përsëriti thirrjen për mbrojtjen e mjedisit dhe të komuniteteve vendase, duke iu referuar edhe nxitjes apostolike Querida Amazonia. Ai shprehu dëshirën për një Amazonë që mbron të drejtat e më të varfërve, të popujve autoktonë dhe të njerëzve më të pambrojtur.
Papa denoncoi problemet që vazhdojnë të rëndojnë mbi këto territore dhe që thellohen nga interesat ekonomike e shfrytëzimi i pakontrolluar, duke vënë në rrezik ekuilibrin e natyrës. Sipas tij, vuajtja e tokës dhe ajo e të varfërve janë të lidhura: ruajtja e pyjeve të Amazonës nuk mund të ndahet nga kujdesi për banorët e tyre, ndërsa mbrojtja e mjedisit duhet të shkojë gjithmonë krah drejtësisë sociale.







