SHA EMV shpalli dje tenderin për të zgjedhur një operator privat që do të nxjerrë mbetjet dhe qymyrin nga miniera e Obiliqit në Kosovë, do ta përpunojë e analizojë qymyrin dhe më pas do ta transportojë drejt termocentraleve të RMV-së, TEC Manastir dhe TEC Osllomej. Tenderi është pjesë e bashkëpunimit të dakordësuar mes EMV-së dhe kompanisë energjetike të Kosovës, KEK, për të siguruar sasi shtesë qymyri për prodhimin e energjisë elektrike në Maqedoni.
Dokumentacioni parashikon dërgimin e rreth 1 milion tonëve qymyr në vit, me një mesatare prej rreth 2.500 tonësh në ditë. Nga kjo sasi ditore lejohet një devijim prej plus ose minus 30 përqind. Kontrata e operatorit që do të zgjidhet do të zgjasë 36 muaj.
Të lidhura
None found
EMV e negocion dhe e blen qymyrin nga KEK-u i Kosovës. Operatori privat, nga ana tjetër, do të marrë përsipër nxjerrjen e mbetjeve dhe qymyrit, përpunimin, analizën dhe transportin e tij në termocentralet e Maqedonisë. Pagesa për këto shërbime do të jetë e ndarë nga çmimi me të cilin EMV blen qymyrin nga kompania kosovare.
Për këtë angazhim, EMV kërkon një operator me kapacitete të konsiderueshme financiare, njerëzore dhe teknike. Kompania duhet të ketë realizuar të ardhura vjetore prej të paktën 750 milionë denarësh në secilin prej viteve 2023, 2024 dhe 2025. Operatorit të përzgjedhur do t’i kërkohet gjithashtu një garanci prej pesë përqind për zbatimin cilësor të kontratës.
