Në një konferencë për shtyp sot, Blerim Sejdiu nga VLEN deklaroi se BDI-ja ka mundësuar hyrjen e projekteve serbe në Maqedoni. Ai përmendi Alta Bankën, Daka Davidoviqin, MTel-in dhe projekte të tjera që, sipas VLEN-it, kanë hyrë në vend me mbështetjen e BDI-së.
Sejdiu kërkoi që Ali Ahmeti të largohet nga drejtimi i BDI-së dhe të tërhiqet përfundimisht nga politika. Ai u bëri thirrje anëtarëve të partisë, si edhe faktorëve politikë që bashkëpunojnë me udhëheqjen e saj, të distancohen nga ajo që e quajti turp.
Të lidhura
None found
Sipas Sejdiut, ministrat e BDI-së propozuan dhe mbështetën vendime që i hapën rrugë bashkëpunimit të shtetit me Alta Bankën nga Beogradi. Në renditjen e tij ai përfshiu edhe Daka Davidoviqin në Tetovë, operatorin MTel dhe Ballkanin e Hapur, të cilin e cilësoi projekt të Vuçiqit dhe për të cilin tha se Ali Ahmeti ishte mbështetësi më i zëshëm. Sejdiu përmendi gjithashtu tenderin e dështuar të Lotarisë Shtetërore, që sipas tij ishte drejtuar drejt kompanive serbe dhe malazeze, si dhe takimet me funksionarë serbë gjatë kohës kur Bujar Osmani ishte ministër. Ai tha se këto raste tregojnë lidhje të vazhdueshme politike dhe afariste që meritojnë vëmendje institucionale dhe politike.
Alta Banka ka nxitur reagime mes pushtetit dhe opozitës, të cilët akuzojnë njëri-tjetrin se e kanë sjellë bankën në Maqedoninë e Veriut.
