Nga Dublini, kryeministri Edi Rama komentoi raportin e Komisionit Europian, debatet rreth protestave të “Flamingove” dhe projektin e Jared Kushnerit për ishullin e Sazanit.
Rama deklaroi se raporti i Komisionit Europian është hartuar mbi fakte dhe nuk është ndikuar nga perceptime apo interesa të jashtme. Sipas tij, dokumenti përfaqëson një vlerësim të plotë dhe të besueshëm mbi zhvillimet në vend.
Të lidhura
None found
“Komisioni Europian është një mekanizëm shumë i sofistikuar për shqyrtimin dhe vlerësimin e fakteve. Sot qarkullojnë shumë raporte që mbështeten te perceptimet dhe interesat, ndërsa raporti i Komisionit është një analizë tërësore e asaj që funksionon dhe e asaj që nuk shkon mirë”, u shpreh kryeministri.
Ai shtoi se, pavarësisht indinjatës së madhe dhe jehonës që çështja pati në mediat ndërkombëtare, raporti nuk u ndikua në vlerësimin e fakteve. “Nuk ka asnjë mundësi që kjo të ndikojë në çfarëdo mënyre te Komisioni”, tha Rama.
Duke iu referuar protestave, kryeministri e përshkroi “Revolucionin e Flamingove” si pasojë të kundërshtisë ndaj presidentit amerikan Donald Trump. Ai pretendoi se, nëse kjo çështje mjedisore nuk do të ishte lidhur me hijen e Trumpit, flamingot në Shqipëri nuk do të ishin bërë temë ndërkombëtare.
“Të gjithë ata që urrejnë Trumpin e gjetën bulevardin e Tiranës si vendin ku mund të zhvillonin këtë betejë, njësoj si Cezari që zgjodhi Shqipërinë e Jugut për përballjen përfundimtare me Pompeun. Për një vend të vogël është shumë e vështirë që e vërteta të dëgjohet në hapësirën e madhe të medias së sotme”, deklaroi Rama.
Sa i përket projektit të Jared Kushnerit në ishullin e Sazanit, kreu i qeverisë tha se investitori nuk është trajtuar ndryshe nga investitorët e tjerë vendas apo ndërkombëtarë. Ai bëri të ditur se negociatat vazhdojnë dhe nënvizoi se opinioni publik shqiptar duhet të jetë pjesë e këtij procesi.
Rama tha se vetëm 8 për qind e sipërfaqes së ishullit parashikohet të ndërtohet. Sipas tij, kërkesa e qeverisë shqiptare është që projekti të shndërrohet në një simbol dhe emblemë të Europës, dhe jo në një investim spekulativ.
“Në këtë çështje, irlandezët kanë shumë ngjashmëri me shqiptarët. Ne nuk jemi francezë, por jemi këmbëngulës dhe të drejtpërdrejtë. Mund të krenohemi edhe me faktin se nuk jemi aq të sofistikuar sa të mos themi të vërtetat për interesat e përditshme”, u shpreh ai.
Kryeministri kujtoi gjithashtu se, pas zgjedhjes së Trumpit, i ishte thënë se miqësia e tij me Sorosin dhe të birin mund të përbënte rrezik. Rama tha se nuk vë në diskutim as miqësinë dhe as besnikërinë ndaj njerëzve me të cilët ka marrëdhënie të gjata.
“Kur takova Kushnerin dhe diskutuam për këtë projekt, e ardhmja e Trumpit nuk ishte aspak e qartë. Ai ishte një kandidat që mund të përfundonte në burg. Unë pashë një amerikan që dëshironte të bënte diçka për vendin tim. Për sa i përket këtij projekti, nuk kam arsye të kem frikë nga ajo që ndodh në Shtetet e Bashkuara të Amerikës, por përkundrazi mund të ndihem krenar”, tha Rama.
Ai theksoi se faktet do të tregojnë se Kushneri nuk ka përfituar trajtim të veçantë dhe se kushtet e ofruara janë të njëjta me ato të investitorëve të tjerë. “Vetëm 8 për qind e ishullit mund të ndërtohet, sepse qeveria shqiptare ka kërkuar një projekt që të jetë emblemë në Europë”, përfundoi kryeministri.
