Brukseli po i kërkon Britanisë të kontribuojë me fonde të tjera për zbatimin e Planit të Veprimit kundër kalimit të emigrantëve me gomone drejt brigjeve angleze. Kërkesa vjen në prag të një marrëveshjeje të mundshme mes palëve, që mund të diskutohet në samitin e javës së ardhshme.
Pagesa e re do t’i shtohej shumës prej 662 milionë stërlinash që Londra ka premtuar t’i japë Francës për të luftuar kalimet e paligjshme. Sipas mediave angleze, kërkesa është përfshirë në një dokument që është bërë publik.
Të lidhura
None found
Dokumenti është pjesë e Deklaratës së Përbashkët, të hartuar para samitit të 20 nëntorit, që synon rifillimin e marrëdhënieve mes Britanisë dhe BE-së pas Brexit-it. Opozita e ka cilësuar të turpshëm këtë kontribut shtesë, duke thënë se qeveria po e bën këtë në këmbim të asgjëje.
Deri më tani këtë vit, 23 mijë emigrantë kanë kaluar La Manshin. Lajmi vjen teksa kryeministri Andy Burnham po përgatitet të negociojë me Brukselin marrëveshje mbi tregtinë e ushqimeve, energjetikën dhe lëvizjen e të rinjve mes Britanisë dhe vendeve të BE-së.
Burnham ka thënë se do të përcaktojë opsionet për marrëdhëniet afatgjata të Britanisë me Bashkimin Evropian. Ai është shprehur gjithashtu se do të dëshironte që vendi të kthehej në BE gjatë jetës së tij. Plani i Veprimit u nis nga BE-ja në qershor, në bashkëpunim me Francën, Belgjikën, Gjermaninë dhe Hollandën, me synimin për të luftuar migrimin e paligjshëm.
Kontributi financiar britanik mbetet pjesë e pozicionit negociues të BE-së. Qeveria e Londrës ende duhet të deklarojë zyrtarisht nëse do ta pranojë kërkesën.
Një zëdhënës i qeverisë tha se nuk komentojnë dokumentet e publikuara dhe as negociatat që janë ende në zhvillim. Samiti i 20 nëntorit pritet të sqarojë nëse Britania do të paguajë më shumë se 662 milionë stërlinat e premtuara deri tani për Francën. Opinioni publik britanik është shumë kritik, pasi rezultatet e financimit vihen në dyshim ndërsa mijëra emigrantë vazhdojnë të mbërrijnë përmes La Manshit.
