Prokuroria e Elbasanit, ka sekuestruar si provë materiale mbi 300 tonë pluhur industrial nga Uzina e Ferrokromit, në pronësi të kompanisë koncesionare Albchrome.
Materiali është grumbulluar nga sistemi që kap pluhurin gjatë procesit të prodhimit dhe konsiderohet i rëndësishëm për dokumentimin e fakteve nën hetim.
Të lidhura
None found
Dokumentet zyrtare të prokurorisë e përcaktojnë sasinë e sekuestruar në rreth 300 tonë. Mbetjet do të përdoren për të vërtetuar rrethanat dhe faktet që janë objekt i hetimit penal.
Për shkak të llojit dhe sasisë së materialit, prokurorët kanë vendosur që ai të ruhet pranë Albchrome sh.p.k. Kompania ka detyrimin ligjor ta mirëmbajë dhe ta ruajë, si edhe t’ia vërë në dispozicion organit procedues sa herë t’i kërkohet.
Pezullimi i aktivitetit pas konstatimit të 318 tonëve mbetje
Çështja u bë publike më 28 maj, kur Inspektorati Kombëtar i Mbrojtjes së Territorit pezulloi aktivitetin e Albchrome. Gjatë kontrolleve, inspektorët konstatuan depozitimin e 318 tonëve mbetje të rrezikshme, të cilat, sipas autoriteteve, nuk ruheshin në kushtet e nevojshme të sigurisë.
Kontrollet evidentuan gjithashtu se kompania nuk kishte kontrata për transferimin, evadimin, asgjësimin ose përpunimin e kësaj sasie mbetjesh.
AKM i cilëson mbetjet shumë të rrezikshme
Agjencia Kombëtare e Mjedisit (AKM) i ka kushtuar vëmendje të veçantë rastit. Në raportin e saj, ajo i ka vlerësuar mbetjet si shumë të rrezikshme.
Materiali në fjalë është pluhuri që grumbullohet nga sistemi i posaçëm për kapjen e emetimeve gjatë prodhimit të ferrokromit. Vlerësimi mjedisor ka ngritur shqetësime serioze për rrezikshmërinë e tij.
Sekuestrimi nga Prokuroria e Elbasanit, shënon një zhvillim tjetër në hetimin për mbetjet industriale në Uzinën e Ferrokromit. Hetimet pritet të sqarojnë si janë administruar, depozituar dhe trajtuar ato, cilat janë përgjegjësitë përkatëse dhe nëse janë respektuar detyrimet ligjore për mbrojtjen e mjedisit dhe të shëndetit publik.
