Në ceremoninë e diplomimit të gjeneratës së 63-të të policëve të rinj, ministri në detyrë i Punëve të Brendshme, Xhelal Sveçla, u tha zyrtarëve se nuk do të mbeten vetëm gjatë ushtrimit të detyrës. Ai premtoi se Qeveria do të vijojë t’u ofrojë mbështetjen, kushtet dhe mundësitë e nevojshme për punën e tyre.
Deklaratat e Sveçlës vijnë në një kohë kur Policia e Kosovës po përballet me mungesë uniformash për zyrtarët policorë.
Të lidhura
None found
Sipas tij, buxheti i Policisë së Kosovës është rritur nga 109 në 173 milionë euro, afërsisht 60 për qind. Ai bëri të ditur se gjatë pesë viteve të fundit për këtë institucion janë alokuar dhe shpenzuar gjithsej 732 milionë euro.
Duke folur për furnizimin, Sveçla theksoi se procedurat administrative dhe ato të prokurimit nuk do ta ndalin përkushtimin e Qeverisë apo zhvillimin e Policisë së Kosovës.
Ministri në detyrë kërkoi nga eprorët dhe menaxhmenti policor të sigurohen që përkrahja qeveritare të përkthehet në punë më efikase të zyrtarëve. Ai e cilësoi suksesin e tyre në shërbim të qytetarëve si përgjegjësi dhe synim të përbashkët.
