Ministrja e Financave, Gordana Dimitrieska-Koçoska, thotë se nuk ishte në mesin e personave të konsultuar nga guvernatori i Bankës Popullore, Trajko Sllaveski, për hyrjen e Alta Bankës në tregun e Maqedonisë dhe blerjen e Stopanska Banka Manastir. Sipas saj, ministria nuk kishte dijeni as për negociatat dhe as për subjektet e tjera që kishin shprehur interes.
Disa ditë më parë, në emisionin “Top Tema”, Sllaveski deklaroi se për këtë çështje kishte zhvilluar konsultime edhe me Qeverinë, ndonëse Banka Popullore është institucion i pavarur.
Të lidhura
None found
Koçoska, ministria e së cilës mbikëqyr Policinë Financiare dhe Drejtorinë për Inteligjencë Financiare, këmbëngul se nuk është përfshirë në diskutime. Ajo tha se edhe pas marrjes nën administrim të Alta Banka Manastir nga Banka Popullore, nuk ka marrë të dhëna për zhvillimet dhe është informuar kryesisht përmes mediave.
“Ministria nuk ka pasur asnjë komunikim për këtë çështje. Nuk dinim se banka kishte negociuar dhe as cilat institucione apo banka të tjera kishin qenë të interesuara më herët. E them me përgjegjësi të plotë: Ministria e Financave nuk ka komunikuar me guvernatorin lidhur me këtë rast”, u shpreh ministrja.
Megjithatë, Koçoska nuk mendon se situata e Alta Bankës përbën rrezik për sistemin bankar të vendit, pasi pesha e saj në sektor është e vogël. Ajo u shpreh gjithashtu se kursimtarët nuk kanë arsye për shqetësim. Gjatë ditës së sotme, ministrja pritet të takohet me guvernatorin Trajko Sllaveski.
