Një qendër për shpërndarjen e ndihmave humanitare në fshatin Komyshuvakha të rajonit të Zaporizhzhias, në jug të Ukrainës, është goditur nga një sulm ajror rus. Bilanci është të paktën 24 të vdekur dhe pesë të plagosur.
Kreu rajonal, Mykhailo Semikin, njoftoi se mbi zonë ranë nëntë bomba ajrore, të cilat lanë pas shkatërrime të rënda. Në mesin e të vrarëve ndodhen dy pjesëtarë të ekipeve të shpëtimit dhe katër efektivë policie.
Të lidhura
None found
Kërkimet për të mbijetuar nën rrënoja po vazhdojnë, por sulmet e dronëve rusë në zonë kanë detyruar pezullimin e operacionit disa herë, duke penguar punën e autoriteteve. Shërbimi Shtetëror i Emergjencave të Ukrainës (DSNS) përcolli paralajmërimin e autoriteteve se numri i viktimave mund të shtohet, pasi dyshohet se nën rrënoja ndodhen ende disa persona.
Presidenti i Ukrainës, Volodymyr Zelensky, tha se objekti i bombarduar ishte një shkollë e zonës, e kthyer në hapësirë për nevoja humanitare. Ai e dënoi goditjen, duke e përshkruar si një veprim krejtësisht të tmerrshëm.
Në rrëfimin e tij për ngjarjen, Zelensky bëri të ditur se i njëjti vend u godit sërish pas bombardimit fillestar, në kohën kur njerëzit po kërkonin strehim në zonë.
Përmes një reagimi në rrjetet sociale, presidenti ukrainas u shpreh se rusët duhej ta dinin që banorët e mbetur në Komyshuvakha shkonin atje çdo javë për të marrë ndihma humanitare.
Sipas Zelenskyt, kjo ngjarje përbën një provë më shumë të mungesës së interesit të Moskës për zbutjen e tensioneve dhe për përpjekjet për paqe. Ai shtoi se, me vrasje të tilla, Rusia jep mesazhin e kundërt dhe tregon se po mbështetet te vrasje të tjera.
