Deputetët e Komisionit për Legjislacion kanë kërkuar që institucionet përgjegjëse të mbajnë përgjegjësi për vrasjen e Arlinda Zekajt në Vitomiricë të Pejës. Viktima kishte kërkuar mbrojtje nga organet kompetente vetëm tri ditë para se të vritej.
Deputetja e PDK-së, Blerta Deliu-Kodra, kërkoi dorëheqjen e kryeprokurores së rastit, Lumturie Buçetaj, si dhe të prokurorëve përgjegjës. Sipas saj, përballë rasteve të përsëritura të dhunës ndaj grave, ngushëllimet nuk mund të jenë reagimi i vetëm institucional.
Të lidhura
None found
Deliu-Kodra tha se Komisioni për Legjislacion duhet të shqyrtojë përgjegjësinë përgjatë gjithë zinxhirit komandues, në vend që të kufizohet te reagimet pas vrasjeve.
Ajo deklaroi se Arlinda Zekaj ishte vrarë “në duart e shtetit”, pasi në një letër drejtuar institucioneve kishte kërkuar mbështetje dhe mbrojtje për shkak të kërcënimeve që kishte marrë.
Sipas Deliu-Kodrës, deputetët nuk duhet të mjaftohen me shprehjen e ngushëllimeve, ndërsa përgjegjësia institucionale duhet të jetë në qendër të diskutimit. Ajo theksoi se dorëheqja e kryeprokurores së rastit, Lumturie Buçetaj, dhe e prokurorëve përgjegjës është masa minimale që duhet të ndërmerret.
Deputetja e PDK-së shtoi se letra e viktimës ngre pikëpyetje për ndërgjegjen e shoqërisë dhe të deputetëve, pasi shteti nuk arriti t’i garantonte mbrojtje. Ajo paralajmëroi se një ditë viktimë mund të jetë një familjare apo vajza e cilitdo prej tyre.
Edhe deputetja e LDK-së, Doarsa Kica-Xhelili, kritikoi mënyrën se si institucionet dhe politika kanë reaguar ndaj dhunës dhe vrasjeve të grave. Ajo tha se që nga viti 2022 deri në fund të vitit 2026 janë shënuar raste sistematike, ndërsa reagimet kanë mbetur në statuse në Facebook, fjalime në Kuvend, seanca të jashtëzakonshme dhe politika që nuk kanë sjellë ndryshime konkrete.
Kica-Xhelili u shpreh se deputetët duhet të pyesin veten nëse kanë ende besueshmëri për t’u thënë grave të Kosovës se mund t’u ofrojnë zgjidhje. Ajo kërkoi që dallimet partiake të lihen mënjanë dhe përmendi edhe një rezolutë për këtë çështje, të cilën e kishte paraqitur në fund të vitit 2022, por që sipas saj ishte politizuar.
Ajo theksoi se nuk mjaftojnë as seancat, as raportimet, as politikat në letër dhe as fjalimet, nëse institucionet nuk janë në gjendje ta kryejnë detyrën siç duhet. Sipas saj, nëse nuk mund ta zgjidhin këtë problem, deputetët duhet të japin dorëheqje dhe t’ua lënë vendin personave më të aftë.
Deputeti i Aleancës, Besnik Tahiri, e cilësoi vrasjen si dështim të shtetit dhe të institucioneve përgjegjëse. Ai kërkoi krijimin e një komisioni hetimor parlamentar, duke thënë se çështja duhet të hetohet në raport me policinë, prokurorinë dhe qendrat për punë sociale.
Tahiri tha se këto tri institucione janë adresat kryesore ku trajtohen rastet e dhunës në familje dhe kërcënimeve. Sipas tij, duhet të përcaktohet nëse institucionet kanë dështuar me dashje apo pa dashje, ndërsa përgjegjësit duhet të japin llogari.
Ai propozoi që hetimi të ketë një shtrirje më të gjerë, duke përfshirë edhe edukimin shoqëror. Tahiri tha se në këtë diskutim duhet të përfshihen akademikë të shkencave, sociologë, psikologë dhe historianë, pasi shoqëria po jeton në shekullin e 21-të dhe duhet të ketë guxim të diskutojë edhe ndikimin e normave të vjetra, përfshirë kanunin.
Deputetja e LVV-së, Arijeta Rexhepi, deklaroi se institucionet duhet të përgjigjen sa herë që një grua kërkon ndihmë pranë policisë apo organeve të tjera kompetente.
Rexhepi tha se në takimet e ardhshme dhe në seancën e jashtëzakonshme, krahas diskutimeve, duhet të kërkohet llogari nga organet përgjegjëse për mënyrën se si kanë përmbushur detyrën e tyre për mbrojtjen e grave dhe familjeve. Ajo shprehu ngushëllime dhe uroi që raste të tilla të mos përsëriten.
Në nisje të mbledhjes, kryetari i Komisionit për Legjislacion, Vigan Qorolli, shprehu ngushëllime për familjen e viktimës dhe kërkoi që drejtësia të vihet në vend.
Qorolli njoftoi se gjatë javës do të kërkohet një takim urgjent me përfaqësuesit e Këshillit Prokurorial të Kosovës dhe të Këshillit Gjyqësor të Kosovës. “Do të kërkojmë urgjent një takim me përfaqësues të KPK-së dhe KGJK-së”, tha ai.
Arlinda Zekaj u vra të dielën në mbrëmje në Vitomiricë të Pejës. Për ngjarjen dyshohet kunati i saj, i cili, sipas informacioneve të bëra publike, vazhdon të jetë në arrati. Sipas të dhënave fillestare, vrasja ndodhi brenda shtëpisë dhe dyshohet se viktima u vra me sëpatë.
