ODIHR-i po ndjek nga afër procesin zgjedhor në Serbi. Gilles Baum, Koordinatori Special i OSBE-së për misionin e vëzhgimit afatshkurtër, e cilësoi pjesëmarrjen e lartë si tregues pozitiv për vendin. Ndërkaq, Federica Honori, që drejton misionin e Asamblesë Parlamentare të OSBE-së, vuri në dukje se një pjesë e rekomandimeve të ODIHR-it nuk janë zbatuar.
Gjatë një konference për shtyp, Baum tha se zgjedhjet e parakohshme parlamentare kanë rëndësi të veçantë për Serbinë. Ai shtoi se interesi i madh dhe numri i lartë i votuesve tregojnë se qytetarët duan të ndikojnë në të ardhmen e vendit dhe në demokracinë e tyre, duke e quajtur këtë një shenjë të mirë për Serbinë.
Të lidhura
None found
Honori, deputete italiane, bëri të ditur se rreth 70 anëtarë të misionit po vëzhgojnë votimet në të gjithë vendin. Sipas saj, misioni do t’i ketë të gjitha detajet sot, ndërsa gjetjet do t’i paraqesë nesër, në orën 15:00, në një konferencë për shtyp në Metropol.
Ajo tha se rekomandimet e ODIHR-it janë zbatuar vetëm pjesërisht. Këto përfshijnë, kryesisht, çështjet e sigurisë së gazetarëve dhe përdorimin e parave publike për shpenzimet e fushatës dhe qëllime politike.
Bom shtoi se misioni i ODIHR-it është takuar me dy forca kryesore politike: Listën e Studentëve dhe listën e Serbisë së Bashkuar. Të dyja, sipas tij, kanë deklaruar se do t’i pranojnë rezultatet pasi ato të shpallen.
Sot në Serbi po zhvillohen zgjedhjet e parakohshme parlamentare. Qendrat e votimit janë të hapura nga ora 7:00 deri në orën 20:00.
Të drejtë vote kanë 6,451,292 qytetarë. Votimi po zhvillohet në 8,392 qendra, përfshirë 29 në burgje dhe 93 jashtë Serbisë, të vendosura në 37 vende. Jashtë vendit janë 102,147 votues.
Për 250 vende në Parlamentin e Serbisë garojnë gjithsej 2,418 kandidatë, të regjistruar në 18 lista zgjedhore. Gjysma e listave kanë statusin e listave të pakicave. Pragu zgjedhor për hyrje në parlament është tre përqind, ndërsa për listat e pakicave kombëtare vlen pragu natyror.
Sipas të dhënave të GIK-ut, në qendrën e votimit nr. 3 në Kraljevo procesi u ndërpre pasi në listën e votuesve mungonte një faqe me emrat e zgjedhësve të regjistruar. Votimi rifilloi pas mbërritjes së listës së plotë.
