Një muaj pas aktgjykimit dënues të shkallës së parë ndaj katër ish-krerëve të UÇK-së, nënkryetarja e PDK-së, Vlora Çitaku, deklaroi se tashmë janë ndërmarrë veprime konkrete për të ndihmuar ekipet mbrojtëse në procesin e Apelit.
Të lidhura
None found
Sipas saj, angazhimi për këtë çështje duhet të vazhdojë deri në përfundim, ndërsa theksoi se çlirimtarët nuk do të braktisen.
Çitaku tha se janë duke u zhvilluar hapa konkretë për forcimin e mbrojtjes së Hashim Thaçit, Kadri Veselit, Jakup Krasniqit dhe Rexhep Selimit në Apel, me synimin për rrëzimin e aktgjykimit. Ajo përmendi gjithashtu nisma që synojnë mbrojtjen e UÇK-së dhe të gjithë çlirimtarëve, duke kërkuar angazhim serioz, përkushtim dhe përdorimin e të gjitha kapaciteteve shtetërore.
Ajo kujtoi se sot shënohet një muaj nga vendimi i Dhomave të Specializuara në Hagë, të cilin e cilësoi të padrejtë. Sipas saj, kjo periudhë ka qenë e vështirë për katër ish-krerët e UÇK-së, familjet e tyre dhe të gjithë ata që besojnë se lufta për liri e Kosovës ishte e drejtë.
Çitaku tha se gjatë 21 ditëve qytetarët protestuan në sheshe kundër asaj që e konsideruan padrejtësi. Ajo vlerësoi se pjesëmarrësit u bashkuan nga bindja se njerëzit që qëndruan pranë Kosovës në ditët më të vështira të saj duhet të kenë mbështetjen e vendit edhe sot.
Sipas saj, përpjekja për ta goditur UÇK-në ka bërë që ajo të rikthehet në qendër të ndërgjegjes kombëtare, si një vlerë e pakontestueshme që bashkon Kosovën.
Nënkryetarja e PDK-së përsëriti se çlirimtarët nuk do të lihen vetëm në asnjë moment dhe se mbështetja për ta do të vazhdojë deri në kthimin e tyre të lirë në atdhe.
