Pas ndërhyrjes kirurgjikale në Romë, Papa Leone XIV ka përcjellë mesazhin e tij të parë, ku u shprehu mirënjohjen besimtarëve katolikë për lutjet dhe mbështetjen e treguar gjatë kësaj periudhe të vështirë për shëndetin e tij.
Të lidhura
None found
Mesazhi iu drejtua pjesëmarrësve të një simpoziumi të organizuar me rastin e 10-vjetorit të dokumentit Amoris laetitia, të hartuar nga paraardhësi i tij, Papa Françesku. Kreu i Kishës Katolike falënderoi besimtarët për lutjet dhe përkushtimin e tyre.
“Siç e dini, gjatë këtyre ditëve nuk kam mundur të jem mes jush”, shkroi Ati i Shenjtë.
Papa e cilësoi shkëmbimin e përvojave dhe dëgjimin me vëmendje mes pjesëmarrësve si një dhuratë për të gjithë Kishën. Në fund, ai u kërkoi besimtarëve të vijojnë të luten për të, duke shtuar se edhe ai lutet për ta.
Sipas të dhënave të bëra publike nga ekipi mjekësor që po ndjek gjendjen e tij, Papa është diagnostikuar me adenokarcinomë pulmonare, një prej formave më të zakonshme të kancerit të mushkërive.
Ndërhyrja kirurgjikale në Romë zgjati rreth 90 minuta, gjatë së cilës mjekët hoqën lobin e poshtëm të njërës prej mushkërive.
Mjekët Luigi Carbone dhe Stefano Margaritora njoftuan se rikuperimi i Papës po zhvillohet sipas pritshmërive. Ai ka ecur në dhomën e spitalit dhe ka ngrënë mëngjesin dhe drekën.
Gjatë fundjavës, Papa kishte informuar besimtarët e mbledhur në Sheshin e Shën Pjetrit për operacionin e planifikuar, duke bërë të ditur se masa në mushkëri ishte zbuluar në një fazë të hershme.
Për t’u përqendruar te trajtimi dhe rikuperimi, Papa Leone XIV ka anuluar të gjitha daljet publike deri më 20 tetor.
Megjithatë, ai pritet të udhëtojë muajin e ardhshëm drejt Amerikës së Jugut, në një vizitë të gjatë, realizimi i së cilës do të varet nga gjendja e tij shëndetësore dhe rekomandimet e mjekëve.
