Jeton Zulfaj, kryenegociatori i Kosovës me Bashkimin Evropian, ka zhvilluar në Bruksel një takim me eurodeputetin Reuten në ambientet e Parlamentit Evropian, ku tema qendrore ishte ecuria e Kosovës në rrugën drejt integrimit evropian dhe domosdoshmëria e përshpejtimit të këtij procesi.
Të lidhura
None found
Gjatë bisedës, Zulfaj shprehu mirënjohjen ndaj eurodeputetit Reuten për përkushtimin dhe përkrahjen e pandërprerë që i ka dhënë Kosovës, sidomos në kuadër të procesit të integrimit në BE.
Reuten ka pasur një rol kyç në liberalizimin e vizave për Kosovën, duke shërbyer si raportues i Parlamentit Evropian për këtë çështje, çka u hapi rrugë qytetarëve kosovarë të udhëtojnë pa viza në hapësirën Schengen.
Kryenegociatori theksoi se përparimi i Kosovës në rrugën drejt anëtarësimit në BE përbën një interes të dyanshëm, si për vendin ashtu edhe për vetë Bashkimin Evropian.
Ai vuri në dukje se zgjerimi i bllokut evropian duhet të udhëhiqet nga parimi i meritës, respektimi i shtetit ligjor dhe përputhja me vlerat themelore të BE-së, siç përcaktohen në nenin 2 të Traktatit të Bashkimit Evropian.
Po ashtu, u vu theksi te nevoja që Kosova të harmonizohet tërësisht me Politikën e Përbashkët të Jashtme dhe të Sigurisë të BE-së, si një hap i rëndësishëm në forcimin e mëtejshëm të procesit integrues.
Ky takim në Bruksel bën pjesë në serinë e konsultimeve që kryenegociatori Jeton Zulfaj po zhvillon me ligjvënës të Parlamentit Evropian dhe zyrtarë të lartë të institucioneve evropiane, me vëmendje të posaçme ndaj perspektivës evropiane të Kosovës.
