Ambasadori bullgar në Maqedoni, Zhelezko Radukov, deklaroi dje para gazetarëve se rasti i Iva Mihailovës kishte qenë që në nisje një çështje thjesht humanitare dhe se nuk kishte pse të merrte ngjyrime politike. Këtë e tha pas daljes nga Ministria e Punëve të Jashtme dhe Tregtisë së Jashtme të RMV-së.
Të lidhura
None found
Ministria e Punëve të Jashtme njoftoi se ambasadorja bullgare ishte thirrur për shkak të zhvillimeve rreth Iva Mihailovës dhe trajtimit që asaj iu bë në Sofje.
“Deri tani askush nuk e ka takuar apo pritur Mihailovën në Bullgari. Megjithatë, është krejt e natyrshme që një rast i tillë humanitar të ngjallë interes, përfshirë edhe nga zonja Jotova, si presidente dhe si nënë. Ajo ndoshta do ta takojë në një moment, pasi është e hapur të shqyrtojë çdo situatë të kësaj natyre”, u shpreh Radukov për “Sitel”, duke u kërkuar mediave të verifikojnë informacionet që publikojnë.
Ai theksoi se Ministria e Jashtme e RMV-së shprehu shqetësimin e saj për ngjarjen.
“Edhe unë ndava shqetësimet e mia, sepse edhe për ne ardhja e Mihailovës në Sofje ishte befasi. Sigurisht që nuk mund ta mirëpresim, por e kuptojmë se në një gjendje dëshpërimi, ajo zgjodhi të vijë në Bullgari. Ju vetë e dini se besimi në sistemin gjyqësor këtu është 2 deri 3 përqind. Si mund të ketë besim në institucione kur ekzistojnë mekanizma ligjorë normalë për personat që kanë nevojë për trajtim jashtë vendit dhe që kanë masa kufizuese që mund të hiqen për këtë qëllim? Kjo është mjaft humane dhe zbatohet në praktikë, por për të, si bullgare, këto mekanizma për arsye të panjohura nuk u vunë në lëvizje.
Si mund t’i besohet sistemit kur institucioni kompetent shëndetësor në Maqedoninë e Veriut konfirmon se trajtimi që i duhet nuk mund të realizohet në vend, ndërsa në të njëjtën kohë zyrtarë të lartë politikë pretendojnë se gjithçka është në rregull dhe se ajo po merr kujdesin e nevojshëm shëndetësor? Mund të mos e mbështes vendimin që mori, por në një situatë kaq të dëshpëruar, e kuptoj plotësisht”, përfundoi Radukov./Telegrafi/
