Parlamenti rumun nuk miratoi kandidaturën e eurodeputetit liberal Siegfried Muresan për postin e kryeministrit, duke e lënë vendin përballë një krize të zgjatur politike dhe duke shtuar mundësinë e zgjedhjeve të parakohshme.
Të lidhura
None found
Muresan siguroi 182 vota, ndërsa për krijimin e qeverisë kërkoheshin 233 vota, sipas rezultateve zyrtare. Ky ishte kandidati i dytë i propozuar nga Presidenti Nicuşor Dan që rrëzohet nga Parlamenti, pas rënies së qeverisë pro-europiane të Ilie Bolojan në fillim të majit.
Para Muresanit, kreu i shtetit kishte përzgjedhur edhe dy emra të tjerë për drejtimin e qeverisë. Këshilltari presidencial Eugen Tomac e hoqi kandidaturën përpara se ajo të hidhej në votim, ndërsa liberal Adrian Vestea nuk arriti të merrte mbështetjen e nevojshme.
Pas votimit, kreu i Aleancës për Bashkimin e Rumunëve (AUR), partia e dytë më e madhe e vendit, deklaroi se edhe propozimi për Muresanin kishte dështuar. AUR ka njoftuar se do të kundërshtojë çdo kandidat të propozuar nga presidenti dhe kërkon zhvillimin e zgjedhjeve të parakohshme.
Forca e ekstremit të djathtë renditet e para në dy sondazhet e fundit, ku mbështetja për të vlerësohet rreth 40% në njërin rast dhe 36% në tjetrin.
Edhe Partia Socialdemokrate (PSD), e cila është grupimi më i madh parlamentar me 129 mandate, nuk pranon të mbështesë kandidatët e zgjedhur nga Dan. Socialdemokratët insistojnë që posti i kryeministrit të ardhshëm t’i takojë një përfaqësuesi të partisë së tyre.
Përplasjet politike zhvillohen në një periudhë të vështirë financiare për Rumaninë. Në mesin e prillit, PSD u tërhoq nga qeveria, duke kundërshtuar masat shtrënguese të përdorura për reduktimin e deficitit buxhetor, i cili është më i larti në Bashkimin Europian.
Më vonë, PSD u bashkua me AUR për të rrëzuar qeverinë e Bolojan. Megjithatë, pasi nuk është gjetur ende një zëvendësues, Bolojan ka vazhduar të ushtrojë detyrën e kryeministrit.
