Izraeli e pret me trysni të lartë ndeshjen kundër Kosovës, pasi një disfatë tjetër do t’ia komplikonte ndjeshëm synimet në Ligën e Kombeve. Mediumi izraelit “Israel Hayom” e cilëson përballjen e së enjtes, e cila nis në orën 20:45, si një sfidë me rëndësi të veçantë.
Të lidhura
None found
Vetëm tri ditë pas humbjes 3-0 ndaj Irlandës, zhgënjimi nga paraqitja e fundit vijon të jetë i pranishëm në Izrael, shkruan “Israel Hayom”. Skuadra e drejtuar nga Ran Ben Shimon i ka humbur të dyja ndeshjet e para dhe një rezultat negativ ndaj Kosovës do ta fuste në një situatë edhe më të vështirë.
Sipas këtij mediumi, një humbje e tretë radhazi do t’ia zvogëlonte në mënyrë drastike Izraelit shanset për të luftuar për objektivat e këtij edicioni. Edhe pse në aspektin matematikor mundësia do të ekzistonte ende, rikthimi në garë do të kërkonte një seri rezultatesh shumë të favorshme në ndeshjet e tjera.
“Israel Hayom” i referohet edhe historikut të Ligës së Kombeve për të përforcuar këtë vlerësim. Që nga themelimi i kompeticionit në vitin 2018, asnjë ekip që i ka humbur dy ndeshjet e para nuk ka arritur ta mbyllë fazën e grupeve në vendin e parë.
Si shembull përmendet Zvicra në edicionin 2022/23, e cila pësoi humbje në tri takimet e para ndaj Republikës Çeke, Portugalisë dhe Spanjës.
Edhe pse zviceranët u rikthyen fuqishëm në pjesën e dytë të kampanjës dhe triumfuan në tri ndeshjet e fundit, duke mbledhur nëntë pikë, kjo nuk ishte e mjaftueshme për vendin e parë. Në fund, ata e përfunduan grupin në pozitën e tretë.
Pikërisht për këtë arsye, mediumi izraelit e konsideron përballjen në Debrecen si një ndeshje që shkon përtej një takimi të zakonshëm të kalendarit. Ajo do të shërbejë si test për pozicionin e Izraelit në tabelë, por edhe për reagimin e ekipit pas humbjes së thellë nga Irlanda dhe kritikave të shkaktuara prej saj.
Në Izrael, fitorja ndaj Kosovës shihet tashmë si e domosdoshme për të mbajtur gjallë synimet në këtë kampanjë. Pas sfidës së së enjtes, Izraeli do të përballet sërish me Irlandën të dielën, ndaj rezultati dhe paraqitja kundër Kosovës marrin edhe më shumë peshë.
