Vetëm pak orë pasi shënoi golin e fitores së Cagliarit ndaj Atalantës në Serie A, Daniel Maldini u përfshi në një aksident automobilistik në Milano.
Të lidhura
None found
Përplasja mes dy automjeteve ndodhi rreth orës 05:15 të mëngjesit në Via Caracciolo, në zonën veriore të qytetit.
Në aksident u përfshinë gjashtë persona dhe të gjithë pësuan lëndime të lehta. Mes tyre ishte edhe Maldini, i cili pritet të mbushë 25 vjeç muajin e ardhshëm.
Lojtari i Cagliarit e kishte kaluar mbrëmjen në Milano, pasi më herët kishte luajtur në Bergamo kundër Atalantës.
Maldini ishte protagonisti i takimit, pasi realizoi nga pika e bardhë golin që vulosi triumfin 2-1 të Cagliarit.
Pas ngjarjes, në vendin e aksidentit mbërritën tre ambulanca dhe një automjet mjekësor. Një person mori ndihmën e parë aty, ndërsa pesë të tjerët, mes të cilëve edhe Maldini, u transportuan në spital për kontrolle të mëtejshme.
Futbollisti u dërgua në Spitalin Fatebenefratelli në Milano, ku kreu ekzaminimet e nevojshme mjekësore.
Të dhënat paraprake tregojnë se gjendja e tij nuk paraqet shqetësim dhe se lëndimet e pësuara janë të lehta.
Policia lokale, ndërkohë, ka hapur një hetim për të sqaruar dinamikën e ngjarjes dhe për të përcaktuar shkaqet e përplasjes.
