Çështja e pagave në sistemin e drejtësisë, ka përplasur përfaqësuesit e opozitës dhe të mazhorancës gjatë mbledhjes së Konferencës së Kryetarëve.
Kreu i grupit parlamentar të PD-së, Gazment Bardhi, ka kritikuar Kuvendin për moszbatimin e një vendimi të Gjykatës Kushtetuese.
Të lidhura
None found
Në krahun tjetër, kryetari i grupit parlamentar socialist, Taulant Balla, ka deklaruar se vendimi është respektuar dhe se kompetenca për përcaktimin e pagave i takon Parlamentit.
Sipas burimeve për gazetaren e Top Channel, Elda Menga, Bardhi i është drejtuar kryetarit të Kuvendit, Niko Peleshit, duke e akuzuar se nuk po respekton Kushtetutën.
“Sot gjykatat janë në kolaps pikërisht sepse ju nuk respektoni Kushtetutën. Ka një vendim të Gjykatës Kushtetuese për pagat e gjyqtarëve dhe ju nuk merreni me atë çështje. Për ju nuk ka rëndësi Kushtetuta. Ka një vendim të Këshillit të Legjislacionit për të zbatuar vendimin e Gjykatës Kushtetuese, por ju nuk veproni. Pasojat janë se gjyqtarët janë pa paga dhe sot gjykatat janë në krizë. Përgjegjës është Kuvendi, i cili nuk respekton vendimet e Gjykatës Kushtetuese”, mësohet të ketë deklaruar Bardhi.
Më tej, kreu i grupit parlamentar të PD-së është shprehur:
“Ju jeni kryetari i Kuvendit, i vetmi në histori që konsideroni më të rëndësishëm zbatimin e një akti qeveritar sesa Kushtetutën. Në hierarkinë e normave ju nuk vendosni Kushtetutën e Shqipërisë, por urdhrat e Këshillit të Ministrave. Na folët këtu se si do të jetë sesioni i ri parlamentar, por ju po e nisni këtë sesion duke shkelur Kushtetutën. E mbyllët sesionin e kaluar duke shkelur Kushtetutën, tani po e nisni me shkelje kushtetuese. Do të duhej që ky Kuvend ta niste sesionin dje. Po ju nuk jeni serioz, nuk e njihni Kushtetutën”.
Taulant Balla ka kundërshtuar akuzat e opozitës, duke mbrojtur veprimet e mazhorancës dhe duke theksuar se janë ndjekur procedurat e parashikuara.
“Ne kemi respektuar plotësisht vendimin e Gjykatës Kushtetuese dhe kemi ushtruar të drejtën tonë kushtetuese për të propozuar ligjin përkatës. Ky krah i Kuvendit nuk ka vënë asnjëherë në diskutim vendimet e Gjykatës Kushtetuese apo të gjykatave të tjera”, u shpreh Balla.
Sipas tij, vendosja e nivelit të pagave është përgjegjësi e Parlamentit dhe jo e gjykatave.
“Në botën demokratike përcaktimi i pagave është kompetencë e Parlamentit, jo e gjykatave”, deklaroi Balla.
Balla bëri të ditur se Grupi Parlamentar i PS-së e ka dorëzuar brenda afatit projektligjin që synon të adresojë vendimin e Gjykatës Kushtetuese. Ai kërkoi që nisma të shqyrtohet me urgjencë në komisione dhe më pas të votohet në seancë plenare.
Debati zhvillohet ndërsa bojkoti lidhur me pagat e gushtit ka prekur administratën dhe sekretarët gjyqësorë, Dhomën Civile dhe Dhomën Penale të Gjykatës së Tiranës, si edhe administratën e Gjykatës së Apelit.
