Pjesëmarrja e Shqipërisë në Europianin e vitit 2016 në Francë do të mbahet mend gjatë, pasi ishte hera e parë që kuqezinjtë luanin në finalet e një eventi kaq madhor.
Në atë kohë, nën drejtimin e trajnerit Xhani De Biazi, Shqipëria koleksionoi dy humbje, por ia doli të merrte një triumf historik përballë Rumanisë në ndeshjen e fundit të grupit.
Kombëtarja fitoi me rezultatin 1-0, teksa golin vendimtar e realizoi Armando Sadiku.
Një rrjetë historike duke u bërë futbollisti i parë dhe i vetëm shqiptar deri në këtë moment që ka realizuar në finalet e një eventi kaq të rëndësishëm. Nga ky moment, janë mbushur ditën e sotme katër vite.
Një fakt të cilin ka vendosur ta kujtojë edhe faqja zyrtare e UEFA-s, e cila ka postuar golin e sulmuesit elbasanas.
Ndërkohë, tashmë mbetet të punohet që Shqipëria të mbërrijë sërish në fazën finale të një Europiani apo Botërori, për të ripërjetuar emocione të mëdha.
