Milan ka arritur të sigurojë një vend në fazën me grupe të Europa League pas një fitoreje dramatike të marrë në fushën e Rio Ave.
Ndeshja e luajtur në Vila do Conde është zhbllokuar në minutën e 51-të nga belgu Saelemaekers, por kundërpërgjigja e portugezëve nuk ka vonuar.
Rio Ave ka barazuar në fillim me Geraldes dhe ka përmbysur më pas me Gelson në fillimin e kohës së parë shtesë.
Kur dukej se vendasit do të merrnin një fitore të madhe ka ardhur çmenduria e Borevkovic, i cili ka shkaktuar një penallti në minutën e fundit të kohës shtesë dhe është ndëshkuar me kartonin e dytë të verdhë.
Te pika e bardhë ka shkuar Calhanoglu që ka barazuar 2-2 dhe i ka dhënë një tjetër shans të tijve për të arritur kualifikimin nëpërmjet penalltive.
Një mundësi kjo që është shfrytëzuar nga milanezët, por jo pa vuajtje. Kuqezinjve, në fakt, u janë dashur 9 penallti për të fituar ndeshjen. Vendimtare pritja e Donnarumma-s ndaj Aderlan.