Lulzim Berisha nuk ka asnjë pronë në emër të tij. Të paktën kështu rezulton në një vërtetim që Kadastra e Durrësit i ka dorëzuar atij pasi policia i kërkoi që të tregonte burimin e pasurisë së tij.
Nga sa pasqyrohet në dokumentin e Kadastrës, asnjë pronë e patundshme nuk rezulton në emër të Lulzim Berishës dhe siç deklaroi edhe dje avokati i tij, ai nuk ka se çfarë të deklaronte.
Ndërkohë ai rezulton pronar me 40% të aksioneve në kompaninë “Rajan 2007” që furnizon me karburant anijet e peshkimit si edhe në një bar kafe në Durrës.
Për të gjitha këto ai ka theksuar se i ka të ligjshme pasuritë.
Lulzim Berisha ka patur 19 000 metra katrorë tokë arë dhe 1 500 metër katror ullishte, të cilat ia sekuestroi gjykata në vitin 2009.
Berisha mori dje një formular ku duhej të deklaronte burimin e pasurisë në kuadër të Operacionit Forca e Ligjit, në të kundërt policia zotohej se do t’ja sekuestronte.
Albeu.com siguroi ekskluzivisht formularin që OFL i dorëzoi Lulzim Berishës për pasurinë. Kërkesa është firmosur Drejtues i Parë i OFL, Arben Dashi.
Në dokument thuhet se “Shtetasi Lulzim Adem Berisha me banim në lagjen nr.5 rruga Adria në Durrës të paraqitet pranë Strukturës Operacioni Forca e Ligjit brenda 48 orësh dhe të lëshojë autodeklaratë në lidhje me:
-Burimin e ligjshëm të sigurimit të pasurisë
-Shkakun e posedimit dhe percaktimin e mases te se drejtes apo interesit te ligjshem qe gezon mbi pasurine.
-Sqarimin e menyres se fitimit te pasurise (ne vecanti burimin e te ardhurave) te ardhura e ligjshme vjetore cdo informacion ne lidhje me pasurine”.
