Ish kryeministri Zoran Zaev ka bërë të ditur se tabelat në dy gjuhë do të lejohen vetëm në mjediset ku shqiptarët janë më shumë se 20 për qind, ndërsa shtoi se beson që tabelat në gjuhën turke mund të instalohen edhe në Gostivar ashtu si edhe ato në gjuhën serbe në Kumanovë.
Në të gjitha komunat e tjera dhe institucionet që gravitojnë në komunat ku shqiptarët janë nën 20 për qind, Zaev tha se do të hiqen. Si shembull ai përmendi Strumicën ku në Prokurorinë Themelore, siç u shpreh ai gabimisht është vendosur tabela në dy gjuhë dhe për të njëjtën premtoi se do të hiqet pasi atje ka vetëm një familje shqiptare dhe jo 20% e popullsisë.
Zoran Zaev
“Kam informacione se edhe Prokuroria Themelore e Strumicës ka tabelë dygjuhëshe, e cila besoj se edhe shpejtë do të hiqet sepse aty nuk janë 20 për qind dhe nuk ka kush ta shfrytëzojë. Kemi një familje të nderuar të cilët e prodhojnë byrekun e bukur të Strumicës por ata flasin rrjedhshëm edhe maqedonishten dhe për atë arsye, një familje nuk janë 20 për qind”
Pikërisht për shkak të nevojës për institucionalizim të zbatimit të ligjit u themeluan dy institucione, një është Agjencioni për zbatimin e gjuhëve dhe inspektoriati për gjuhë dhe këto janë institucionet e vetme që mund të japin interpretime për zbatimin e ligjit të gjuhëve, është kundërpërgjigjur zëvendës kryeministri Bujar Osmani. Ai i ka sugjeruar ish kryeministrit Zoran Zaev dhe të gjithë politikanëve që për çdo dilemë t’u drejtohen ninstitucioneve në fjalë dhe jo të bëjnë interpretime të tyre.
Bujar Osmani
“Për këtë ka institucione adekuate që i paguan shteti, që janë kompetente të interpretojnë ligjin dhe sjellin vendime nëse nuk respektohet ligji. Por meqë hapet kjo temë edhe një herë do të sqaroj. Ligji qartë e definon se në njësitë rajonale të institucioneve qëndrore që mbulojnë të paktën një komunë ku shqiptarët janë mbi 20 përqind edhe në atë institucion gjuha shqipe është zyrtare. Kjo nënkupton se institucionet qëndrore në Prilep që mbulojnë Komunën e Dollnetit, institucionet në Velez që mbulojnë Komunën Çashkë, ose Fondi shëndetësor në Velz që e mbulon Likovën janë gjithashtu dygjuhëshe. Megjithatë vlerësoj se këtë debat duhet ta ndërmarin institucionet, kush ka dilema edhe zotëri Zaev ose kushdoqoftë tjetër, duhet ti drejtohen Agjencionit për gjuhë dhe Inspektoratit për gjuhë dhe ata më së miri e interpretojnë ligjin”
Deklaratat e këtilla vijnë pas vendosjes së tabelave në dy gjuhë në qytete të dominuara me shumicë, një pjesë e të cilave ditëve të fundit edhe u thyen në shenjë revolte nga banorë lokal. Debati rreth ligjit për përdorimin e gjuhëve u rihap pas rekomandimeve të Komisionit të Venedikut ku poashtu politikanët u kundërshtuan gjatë interpretimit të rekomandimeve.
