Kryeministri i Kosovës, Avdullah Hoti ka udhëtuar drejt Brukselit në kuadër të takimit të përbashkët me presidentin e Serbisë, Aleksandar Vuçiç.
Sot (15 korrik) kryeministri Hoti ka pasur disa takime me zyrtarë të Bashkimit Evropian, përfshirë edhe një takim me Komisionarin e BE-së për Fqinjësi dhe Zgjerim, Oliver Verhelyi. Përveç çështjes së dialogut me Serbinë, në këto takime, është folur edhe për asistencën e BE-së në procesin e rimëkëmbjes ekonomike si dhe në përballjen me pandeminë e COVID-19.
Sipas njoftimeve nga BE-ja takimi Hoti-Vuçiq do të nis të enjten në orët e pasdites. Nga ana e BE-së takimin do ta lehtësojnë Përfaqësuesi i lartë i BE-së për politikë të jashtme dhe siguri, Josep Borrell dhe Përfaqësuesi i posaçëm i BE-së për dialogun, Miroslav Lajçak.
Ata pritet që së pari të kenë takime të ndara me kryeministrin e Kosovës, Avdullah Hoti, dhe presidentin e Serbisë, Alekandar Vuçiq, për të pasuar më vonë me një takim të përbashkët në kuadër të dialogut.
