“Superman” i Unitree vrapon më shpejt se Usain Bolt dhe kërcen 2 metra nga vendi

Unitree, kompania kineze e robotikës, ka zbuluar një robot humanoid që, sipas saj, është në gjendje të tejkalojë në shpejtësi Usain Bolt, njeriun më të shpejtë të regjistruar ndonjëherë, si dhe të kërcejë deri në 2 metra nga vendi.

Të hënën, Unitree Robotics bëri të ditur se roboti me emrin “Superman” regjistroi një shpejtësi kulmore prej 12.66 metrash në sekondë, afërsisht 45.6 kilometra në orë. Këmbët e tij janë 0.85 metra të gjata.

Kompania thotë se për krijimin e tij u deshën pak më shumë se tre muaj, ndërsa aftësitë e robotit mund të avancohen më tej.

Ky demonstrim zhvillohet teksa kompanitë në Kinë konkurrojnë për ndërtimin e robotëve humanoidë që realizojnë manovra gjithnjë më komplekse dhe me ritëm më të lartë.

Në një deklaratë tjetër të publikuar gjatë këtij muaji, Unitree njoftoi se ka prodhuar rreth 18 mijë robotë humanoidë dykëmbësh.

Unitree u themelua në vitin 2016 dhe selinë e ka në Hangzhou. Kompania tashmë renditet ndër prodhuesit kryesorë botërorë të robotëve autonomë humanoidë dhe katërkëmbësh.

Roboti i ri u prezantua vetëm pak kohë përpara ofertës fillestare publike të aksioneve (IPO) të Unitree, e cila është parashikuar për të mërkurën në STAR Market, tregu teknologjik i Bursës së Shangait.