Humanoidi “Superman” i Unitree raporton shpejtësi 45.5 km/h, mbi rekordin maksimal të Usain Bolt

Një prototip humanoid i zhvilluar në Kinë ka tërhequr vëmendjen pasi kompania prodhuese pretendon se ai ka kaluar shpejtësinë më të lartë të arritur nga Usain Bolt gjatë rekordit të tij botëror.

Unitree, kompani robotike me seli në Hangzhou, publikoi një video ku modeli i quajtur përkohësisht “Superman” shihet duke vrapuar në një pistë me shpejtësi 12.66 metra në sekondë, ekuivalente me rreth 45.5 km/h.

Gjatë garës së 100 metrave në Kampionatin Botëror të Atletikës në vitin 2009, Usain Bolt regjistroi një shpejtësi maksimale prej afërsisht 12.42 metrash në sekondë, ose 44.7 km/h.

Unitree është e njohur për robotët katërkëmbësh, si edhe për modelet humanoide të projektuar për performancë të lartë.

Videoja tregon gjithashtu se humanoidi kryen një kërcim vertikal prej rreth dy metrash nga vendi.

Nëse kjo shifër do të vërtetohej nga burime të pavarura, ajo do të ishte më e lartë se rekordi njerëzor i raportuar për kërcimin vertikal nga vendi, i cili është rreth 1.7 metra.

“Parapamje e robotit të ri të Unitree: ‘Superman’, duke thyer kufijtë e njerëzimit”, shkroi kompania në platformën X, ku publikoi pamjet.

Sipas Unitree, zhvillimi i këtij roboti ka zgjatur pak më shumë se tre muaj. Kompania shtoi se modeli mund të përmirësohet ndjeshëm gjatë muajve të ardhshëm.

Megjithatë, pretendimet për shpejtësinë dhe kërcimin nuk janë verifikuar ende në mënyrë të pavarur. Të dhënat e publikuara deri tani burojnë vetëm nga kompania që e ka zhvilluar robotin.

Unitree nuk ka bërë publike specifikat e plota teknike, përfshirë lartësinë, peshën, kapacitetin e baterisë apo numrin e testeve të përsëritura për vrapimin dhe kërcimin.

Raportimet bëjnë me dije se këmbët e robotit kanë gjatësi vetëm rreth 0.85 metra. Për këtë arsye, shpejtësia e deklaruar konsiderohet veçanërisht mbresëlënëse, duke pasur parasysh gjatësinë relativisht të kufizuar të hapit.

Demonstrimi duket se synon kryesisht të shfaqë potencialin fizik të makinës, dhe jo një përdorim praktik të caktuar që roboti mund të kryejë aktualisht.

Pamjet u përhapën gjerësisht në rrjetet sociale dhe shkaktuan reagime të ndryshme. Disa përdorues u përqendruan te mënyra e pazakontë e vrapimit.

“Ky mund të jetë vrapimi më qesharak që kam parë ndonjëherë”, komentoi një përdorues.

Një tjetër shkroi: “Vrapon si një tip krejt i ngathët.”

“Ditët sportive në shkolla nuk do të jenë më kurrë njësoj”, u shpreh me shaka një tjetër komentues.

Megjithatë, pati edhe nga ata që e konsideruan demonstrimin si dëshmi të përparimit të shpejtë të robotikës humanoide.

“Nëse hardueri vazhdon të përmirësohet me këtë ritëm, robotët humanoidë shumë shpejt do të jenë në gjendje të bëjnë gjëra jashtëzakonisht mbresëlënëse”, shkroi një përdorues.

“Superman” është modeli më i ri pas humanoidit H1 të Unitree. Ky i fundit u bë i njohur më herët pasi, gjatë një prove, arriti rreth 10 metra në sekondë, ose 36 km/h.

Sipas të dhënave të kompanisë, roboti H1 kushton aktualisht rreth 13,500 dollarë.

Analisti veteran i industrisë teknologjike Ma Jihua deklaroi për “Global Times” se prova të tilla ekstreme shërbejnë në thelb si “stress tests” për harduerin dhe softuerin.

Këto testime i vendosin në kufi aftësitë e robotit për vrapim, kërcim, fuqi shpërthyese, ruajtje të ekuilibrit dhe koordinim. Në këtë mënyrë, inxhinierët mund të përcaktojnë kufijtë realë të sistemit.

Një proces i tillë është i ngjashëm me provat ekstreme të automjeteve dhe avionëve, ku përcaktimi i kufijve teknikë konsiderohet i domosdoshëm përpara përdorimit të sigurt në situata reale.

Robotë me aftësi kaq dinamike mund të përdoren në të ardhmen në terrene të vështira, në zonat e goditura nga katastrofat ose në mjedise ku prania e njerëzve është tepër e rrezikshme.

Unitree ka deklaruar se vetëm gjatë këtij viti ka prodhuar rreth 18 mijë robotë humanoidë. Kjo shifër nuk përfshin modelet e tjera humanoide dhe robotët me rrota.

Kompania ka tërhequr vëmendje edhe përmes demonstrimeve të tjera të pazakonta. Muajin e kaluar, në Shenzhen të Kinës, dy robotë humanoidë u përballën në një ndeshje të stilit MMA, e ndjekur nga qindra spektatorë.

Gjatë përballjes, njërit prej robotëve iu shkëput koka pas një goditjeje, por ai vazhdoi luftën.

Ngjarja solli krahasime me filmin “Real Steel” të vitit 2011. Në rrjetet sociale pati reagime humoristike, por edhe shqetësim për ritmin me të cilin po zhvillohen aftësitë fizike të robotëve humanoidë. /GazetaExpress/