Volkswagen shqyrton mundësinë e ndërprerjes së markës Seat

Volkswagen po vlerëson nëse do ta ndërpresë gradualisht prodhimin e makinave Seat deri në fund të kësaj dekade, ndërsa grupi gjerman po i kushton gjithnjë e më shumë vëmendje markës Cupra.

Megjithatë, për të ardhmen e Seat-it nuk është marrë ende asnjë vendim zyrtar. Markus Haupt, drejtori ekzekutiv i të dy markave, tha se investimet në Seat po vazhdojnë dhe se vitin e ardhshëm kompania planifikon të prezantojë modele të reja me teknologji të butë hibride.

Në një intervistë për revistën Autocar, të zhvilluar gjatë Panairit të Automobilave në Paris, Haupt konfirmoi se mbyllja graduale e aktivitetit të Seat-it është ndër alternativat që po shqyrtohen, por nuk është domosdoshmërisht zgjedhja përfundimtare.

Sipas tij, e ardhmja e markës do të ndikohet nga rregullat e ardhshme për emetimet, si edhe nga kërkesat e konsumatorëve.

“E dimë se emetimet e CO2 tashmë luajnë një rol të rëndësishëm, ndërsa nga viti 2030 rregullat do të bëhen edhe më të rrepta. Megjithatë, ekziston mundësia e një qasjeje më fleksibile, e cila mund të ndikojë drejtpërdrejt në vendimet tona”, deklaroi Haupt.

Edhe pse perspektiva e Seat-it mbetet e pasigurt, marka spanjolle ruan një pozitë të rëndësishme në tregun e automobilave, veçanërisht për modelet që ndërthurin performancën me një çmim të arsyeshëm.

Nuk dihet ende se kur Volkswageni do të vendosë përfundimisht për fatin e markës. Ndërkohë, investimet e njoftuara dhe modelet e reja hibride tregojnë se Seat do të vijojë aktivitetin të paktën në të ardhmen e afërt.