ID.4 ndryshon emër: Volkswagen përgatit SUV-in elektrik ID. Tiguan

SUV-i elektrik ID.4 do të quhet ID. Tiguan pas përditësimit që Volkswagen po përgatit për vitin e ardhshëm. Kjo do të jetë hera e parë që marka lidh emrin e një modeli të saj elektrik me atë të një prej SUV-ve të saj më të suksesshme.

Volkswagen e përdor emrin Tiguan prej afro dy dekadash. Ai është krijuar nga bashkimi i fjalëve gjermane Tiger dhe Leguan, ndërsa modeli ka regjistruar më shumë se 8.3 milionë shitje në mbarë botën, transmeton Telegrafi.

Emri i përbashkët nuk do të thotë se ID. Tiguan është thjesht një variant elektrik i Tiguanit aktual, i cili ofrohet me motor benzine, nafte ose si hibrid plug-in. Dy SUV-të do të qëndrojnë në treg paralelisht dhe do të mbeten modele teknikisht të ndryshme.

Për ID. Tiguan do të përdoret platforma elektrike MEB, kurse Tiguan-i me motorë tradicionalë mbështetet në arkitekturën MQB. Volkswagen pritet t’i mbajë të dy në ofertë për një kohë të gjatë, duke qenë se kalimi te automjetet elektrike po ecën me ritme të ndryshme nga një treg në tjetrin.

Rifreskimi nuk do të kufizohet te ndryshimi i emrit. Ndonëse forma dhe përmasat e përgjithshme pritet të mbeten thuajse të njëjta, pjesa e përparme dhe e pasme e SUV-it do të pësojnë një ridizenjim të ndjeshëm.

Një pamje më katrore synohet të arrihet edhe përmes dizajnit të ri të fenerëve dhe dritave të pasme. Këto ndryshime do të jenë në linjë me gjuhën e dizajnit të modeleve më të fundit elektrike të Volkswagenit, mes tyre ID. Polo dhe ID.3 Neo.

Edhe kabina do të ndryshojë. Pas kritikave për përdorimin e tepruar të sipërfaqeve me prekje në modelet e mëparshme, Volkswagen po u kthehet disa komandave fizike.

Poshtë ekranit qendror do të ketë një rresht butonash fizikë. Ndërkohë, komandat me rrëshqitje që shërbejnë për temperaturën dhe funksione të tjera do të hiqen.

Modeli do të pajiset gjithashtu me një panel dixhital shumë më të madh, butona fizikë në timon dhe komanda të veçanta për dritaret e secilës derë. Volkswagen pritet të rikthejë edhe komandën rrotulluese të volumit, të vendosur mes ulëseve.

Kjo qasje ngjan me ndryshimet që kompania bëri gjatë rifreskimit të fundit të ID.3 Neo dhe tregon se kontrollet fizike po rikthehen gradualisht në modelet e reja të Volkswagenit.

Prezantimi i ID. Tiguan pritet në fillim të muajit të ardhshëm. Në Evropë, shitjet janë planifikuar të nisin në fillim të vitit 2027.

Më vonë, SUV-i do të mbërrijë edhe në Shtetet e Bashkuara. Volkswagen ka konfirmuar se ID. Tiguan është planifikuar të zëvendësojë ID.4 në tregun e Amerikës së Veriut, ndërsa hollësitë për datën e debutimit atje do të bëhen të ditura më pas.

Ndërkohë, nga gama do të largohet ID.5, varianti i familjes ID.4 me linjë më sportive dhe karroceri të tipit coupe.

Me këto lëvizje, Volkswagen po riorganizon familjen e modeleve elektrike, duke zgjedhur emra më të njohur të markës për gjeneratën e ardhshme. /Telegrafi/