Si ndikohen frenat kur vetura mbetet e parkuar për një kohë të gjatë?

Mospërdorimi i një automjeti për një periudhë të zgjatur mund të shkaktojë ndryshime në sistemin e frenimit, duke ndikuar te siguria gjatë vozitjes së parë.

Tamburët dhe diskat e frenave përbëhen kryesisht nga aliazh çeliku, ndërsa mbrojtja e tyre ndaj korrozionit është e kufizuar.

Nëse vetura qëndron për disa orë në një mjedis të lagësht, mbi këto pjesë mund të formohet një shtresë e hollë ndryshku. Gjendja përkeqësohet sa më gjatë që automjeti të mbetet i palëvizur, sidomos kur parkohet në vende me kullim të dobët ose kur frenat bien në kontakt me kripën gjatë dimrit.

Meqë korrozioni mund të dobësojë funksionimin e frenave, drejtuesit duhet të tregojnë kujdes gjatë udhëtimit të parë pas disa ditësh, javësh apo një periudhe edhe më të gjatë pa e përdorur makinën.

Përpara nisjes rekomandohet që pedali i frenave të shtypet dhe të lirohet butësisht disa herë. Më pas, në një zonë të sigurt, duhet të kryhen disa frenime të lehta për të pastruar ndryshkun sipërfaqësor dhe për të verifikuar reagimin e sistemit.

Vëmendje duhet t’u kushtohet edhe tingujve që shfaqen gjatë frenimit. Në rast se kërcitjet apo zhurmat e pazakonta nuk zhduken pas disa frenimeve, sistemi duhet të kontrollohet nga një mekanik.

Ekspertët sugjerojnë gjithashtu që, përpara se automjeti të lihet i parkuar për një kohë të gjatë, të bëhen frenime të buta gjatë një udhëtimi në sipërfaqe të thatë, në mënyrë që papastërtitë të largohen nga pjesët e sistemit të frenimit.