Për më shumë se gjashtë dekada, Ford Mustang ka ruajtur statusin e një prej simboleve më të njohura të automobilizmit amerikan. Por një projekt i ri imagjinar ngre pyetjen se si do të dukej kjo makinë sportive nëse do të merrte një trajtim më modern, më agresiv dhe më pranë stilit të supermakinave.
Koncepti është krijuar nga artisti i renderimeve 3D, Luca Serafini, i cili ka rikonstruktuar në mënyrë virtuale gjeneratën e fundit të Mustang-ut. Rezultati është një interpretim që e çon dizajnin e modelit drejt një pamjeje më ekzotike.
Të lidhura
None found
Edhe pse nuk ka lidhje zyrtare me Ford-in, projekti ruan tiparet që e bëjnë Mustang-un të identifikueshëm menjëherë: kofanon e gjatë, pjesën e pasme voluminoze, siluetën dinamike dhe karakterin klasik të një muscle car-i amerikan, transmeton Telegrafi.
Në pjesën ballore, koncepti mban logon tradicionale të kalit, ndërsa grila është ridizajnuar dhe shoqërohet me shkrimin “MUSTANG”. Fenerët më të ngushtë dhe më agresivë krijojnë përshtypjen e një automjeti më të ulët dhe më imponues.
Ndryshimet vazhdojnë edhe në pjesën e pasme, ku fenerët vertikalë janë bërë më të hollë. Spoileri i integruar dhe dy daljet rrethore të sistemit të shkarkimit e theksojnë edhe më shumë natyrën sportive të këtij versioni.
Në këtë interpretim nuk mungojnë as detajet që lidhen me Mustang-ët e performancës së lartë. Ndër to janë edhe vijat e dyfishta të garave, të cilat lidhen tradicionalisht me modelet Shelby.
Vëmendje të veçantë tërheq edhe pamja anësore. Serafini ka marrë frymëzim nga rivaliteti i vjetër mes makinave amerikane të performancës, duke krijuar një kabinë me linja që sjellin në mendje Chevrolet Camaro-n dhe duke ndërthurur elemente të njohura të muscle car-ëve amerikanë.
Ideja e projektit nuk është që Mustang-u të humbasë identitetin e tij, por të fitojë një paraqitje më elegante, më të pastër dhe më të sofistikuar, duke ruajtur njëkohësisht karakterin amerikan.
Për këtë arsye, dizajni shmang sipërfaqet e ngarkuara dhe përdorimin e tepërt të elementeve plastike, duke u orientuar drejt formave më skulpturore dhe një përfundimi më të rafinuar.
Megjithatë, ky mbetet vetëm një krijim artistik i realizuar në formë renderimi. Ford nuk ka bërë të ditur ndonjë plan për prodhimin e një Mustang-u të tillë dhe nuk ekziston asnjë konfirmim se një model kaq ekzotik është pjesë e strategjisë së kompanisë.
Gjenerata e shtatë e Mustang-ut pritet të ketë ende një rrugëtim të gjatë, ndërsa Ford nuk ka dhënë shenja se synon ta shndërrojë këtë ikonë amerikane në një supermakinë me motor të pozicionuar në qendër.
Nëse në të ardhmen Ford do të vendoste të ndërmerrte një tjetër ndryshim të rëndësishëm në zhvillimin e Mustang-ut, ky koncept ofron një ide se si mund të dukej një variant më elegant, më agresiv dhe dukshëm më ekzotik i legjendës amerikane. /Telegrafi/
