Prodhimi është ndërprerë përkohësisht në uzinat e Dacia dhe Ford, dy prej fabrikave më të mëdha të automobilave në Rumani, për shkak të problemeve që vendi po përballet në furnizimin me energji elektrike.
Të lidhura
None found
Kryeministri i Rumanisë, Ilie Bolojan, bëri të ditur se kompanitë e morën vullnetarisht vendimin për ta pezulluar veprimtarinë prodhuese deri më 19 gusht 2026. Kjo masë synon të pakësojë konsumin e energjisë dhe të zbusë presionin mbi rrjetin elektrik kombëtar.
Autoritetet raportuan se mbyllja e përkohshme e linjave të prodhimit në të dyja fabrikat ka sjellë një ulje prej rreth 200 megavatësh në konsumin kombëtar të energjisë.
Qeveria rumune pret që gjatë kësaj periudhe edhe kompani të tjera të marrin masa të ngjashme për të kufizuar përdorimin e energjisë elektrike.
Situata energjetike po shkakton vështirësi në sektorin industrial të Rumanisë, ndërkohë që autoritetet po punojnë për të stabilizuar furnizimin dhe për të parandaluar mbingarkimin e rrjetit elektrik.
Uzina e Dacia, e cila është pjesë e grupit francez Renault, dhe fabrika rumune e Ford përbëjnë dy prej objekteve kryesore të industrisë automobilistike të vendit, duke punësuar mijëra persona.
