Ferrari F80 Aperta fotografohet për herë të parë në rrugë

Pasi prezantoi Amalfi Spider në fillim të këtij viti, Ferrari tani po përfundon punën për një tjetër model kabriolet.

F80 Aperta është fotografuar nga Derek Photography për herë të parë jashtë uzinës në Maranello. Automjeti u pa gjatë testimeve, në formën e një prototipi të mbuluar gjerësisht me kamuflazh.

Megjithëse maskimi i shumtë mund të krijojë përshtypjen e një ridizajnimi tërësor në raport me kupenë, duket se pjesa më e madhe e ndërhyrjeve është përqendruar mbi kabinë, transmeton Telegrafi.

Ndryshe nga Amalfi Spider, e cila përdor një çati me hapje elektrike, F80 Aperta pritet të pajiset me një çati që hiqet manualisht, sipas zgjidhjes së përdorur më parë te LaFerrari Aperta.

Në këtë hipermakinë të hapur, çatia fikse prej fibre karboni e versionit kupe pritet t’i lërë vendin një paneli prej pëlhure. Me shumë gjasë, pronarët do të mund ta vendosin atë në bagazh pasi ta heqin.

Paraardhësja e saj, ndërkohë, ofrohej edhe me një çati opsionale prej fibre karboni, e disponueshme ose me thurjen e materialit të ekspozuar, ose me përfundim të zi me shkëlqim.

Ferrari do të prodhojë 799 ekzemplarë të versionit kupe. Duke marrë parasysh praktikën e zakonshme të kompanisë, varianti kabriolet pritet të ndërtohet në një numër edhe më të kufizuar.

Dalja e tij në treg mund të ndodhë gjatë vitit 2027, kur prodhuesi italian do të shënojë 80-vjetorin e prezantimit të modelit të parë të prodhimit, 125 S.

Edhe automjeti i parë që mbajti emrin Ferrari ishte një makinë sportive me çati të hapur. Për këtë arsye, momenti duket i përshtatshëm që F80 Aperta të bëjë debutimin vitin e ardhshëm.

Megjithëse F80 përdor një motor V6 dhe jo një V12, kjo nuk i ka dekurajuar koleksionistët që të sigurojnë një ekzemplar.

Të gjitha kuotat e prodhimit për versionin kupe u shitën nga Ferrari përpara se modeli kryesor të mbërrinte në treg. Për rrjedhojë, nuk do të ishte befasuese nëse edhe Aperta do të shitej menjëherë.

Për shkak të çatisë së lëvizshme dhe mundësisë që prodhimi të jetë më i kufizuar, F80 Aperta pritet të kushtojë më shumë se kupeja, çmimi fillestar i së cilës ishte rreth 3.7 milionë dollarë, pa përfshirë opsionet.

F80 Aperta renditet mes 20 modeleve që parashikohet të dalin në shitje deri në fund të vitit 2030. Në këtë listë përfshihen gjithashtu modeli elektrik shumë i diskutuar Luce, 12Cilindri Manuale me një kuti ingranazhesh manuale të simuluar dhe, ndoshta, 296 Challenge Stradale, si variant rrugor i makinës së garave 296 Challenge.

Ka gjasa që gama të zgjerohet edhe me një model të ri ultra-ekskluziv nga seria Icona. Ai pritet të përdorë një motor V12, ngjashëm me Monza SP1/SP2 dhe Daytona SP3.

Sa i përket Luce, Ferrari ka mohuar zërat se po ushtron presion mbi klientët më të pasur për ta porositur makinën elektrike, me qëllim që të përfitojnë vende prodhimi për modelet më ekskluzive të markës.

F80 Aperta pothuajse me siguri do të jetë pjesë e kësaj kategorie të nivelit të lartë, por kompania nga Maranello këmbëngul se sigurimi i këtyre modeleve nuk kushtëzohet me porositjen e një Luce. /Telegrafi/