Bugatti Bolide me motor W16, tashmë i ligjshëm për rrugë falë transformimit të Lanzante

Firma britanike e inxhinierisë automobilistike Lanzante Limited ka ndërtuar reputacionin e saj duke marrë makina të destinuara vetëm për pista dhe duke i përshtatur për qarkullim të ligjshëm në rrugë publike.

Në edicionin e vitit 2026 të festivalit Goodwood, kompania prezantoi një nga arritjet e saj më ambicioze: një Bugatti Bolide të modifikuar për t’u pajisur me targa, raporton Telegrafi.

Bugatti Bolide u konceptua si një model ekskluziv për pista, me një prodhim të limituar që u shtri nga viti 2024 deri në 2025. Nga kjo seri dolën vetëm 40 ekzemplarë dhe asnjëri nuk mori miratimin e fabrikës për dalje në trafikun e zakonshëm. Pikërisht këtu ndërhyn Lanzante.

Nëpërmjet një partneriteti të ngushtë me PRW Advanced Cooling Technology, Lanzante e shndërron këtë bishë të edukuar për pistë në një automjet që lejohet të përshkojë ngadalësuesit e shpejtësisë dhe të lëvizë nëpër rrugët e qytetit.

Procesi i legalizimit të Bolide për rrugë kërkoi një sërë modifikimesh thelbësore, por për syrin e patrajnuar, këto ndërhyrje mund të kalojnë lehtësisht pa u vënë re.

Versioni origjinal i Bolide nuk kishte nevojë për fenerë, meqenëse pistat e garave ofrojnë sistemet e tyre të ndriçimit. Lanzante projektoi një palë fenerë të rinj LED në formë X-je, të cilët integrohen në mënyrë të përkryer me simbolet X ekzistuese në pjesën ballore të veturës.

Pezullimi i optimizuar për pistë u detyrua të zbutet në një farë mase për të përballuar parregullsitë e asfaltit rrugor. Gjithashtu, gomat e tipit Michelin Slick, të destinuara për garë, u zëvendësuan, duke marrë parasysh që ato kanë një jetëgjatësi prej vetëm 37 miljesh dhe një çmim që arrin 8,000 dollarë për komplet.

Një lajm i mirë është se motori nuk pati nevojë për asnjë modifikim. Bëhet fjalë për agregatin 8.0 litra W16 me katër turbo, i cili përdoret edhe në modele rrugore si Chiron. Ky motor zhvillon pak më pak se 1,600 kuaj fuqi, një shifër që premton një përvojë të frikshme në një makinë që peshon më pak se 3,200 paund (para ndërhyrjeve të Lanzante).