BMW sinjalizon tkurrje të ndjeshme të fitimit gjatë këtij viti

BMW AG, kompania automobilistike me bazë në Mynih, ka bërë të ditur se gjatë këtij viti pret një rënie “të ndjeshme” të fitimit para taksave, kryesisht si pasojë e dobësimit të kërkesës në Kinë dhe efekteve që po sjell kriza në Lindjen e Mesme.

Në paralajmërimin për fitimin të publikuar të martën, kompania që zotëron markat BMW, MINI, Rolls-Royce dhe BMW Motorrad theksoi përkeqësimin e situatës në treg, si edhe kostot që lidhen me masat e ristrukturimit.

BMW bëri të ditur se tregu kinez është dobësuar edhe më tej, çka sipas prodhuesit ka shtuar konkurrencën në mbarë rajonin.

Po ashtu, kompania nënvizoi se lufta në Iran ka ushtruar ndikim më të madh sesa ishte parashikuar, duke i mbajtur kostot e energjisë në nivele të larta dhe duke ndikuar te kërkesa e konsumatorëve.

Për rrjedhojë, BMW pret tashmë që dërgesat e automjeteve të shënojnë një rënie të lehtë në krahasim me vitin e kaluar, ndryshe nga pritshmëria e mëparshme që ato të mbeteshin të qëndrueshme.

Si pasojë e këtyre zhvillimeve, kompania tani parashikon që fitimi para taksave të bjerë ndjeshëm nga 10.2 miliardë eurot e vitit të kaluar.

Pas këtij njoftimi, aksionet e BMW ranë me më shumë se 7% në tregjet evropiane të mërkurën në mëngjes.