Zlatko Dalic do të rikthehet në Emiratet e Bashkuara Arabe për të drejtuar përfaqësuesen e futbollit të këtij vendi, duke vërtetuar kështu informacionet që qarkulluan në fund të majit.
Trajneri kroat e njeh mirë futbollin në Emiratet e Bashkuara Arabe, pasi më herët arriti rezultate të rëndësishme në krye të Al-Ain. Tashmë, ai do të synojë ta përsërisë atë sukses edhe në stolin e ekipit kombëtar, raporton Sportske Novosti.
Të lidhura
None found
Burime jozyrtare bëjnë të ditur se Dalic do të paguhet pesë milionë euro në sezon, pa llogaritur bonuset. Shifra është pothuajse tri herë më e lartë se paga që merrte në Federatën Kroate të Futbollit dhe do ta bëjë atë trajnerin kroat më të paguar në histori.
Në stafin teknik të përfaqësueses së Emirateve të Bashkuara Arabe pritet të përfshihet edhe Danijel Subasic, i cili do të mbajë rolin e trajnerit të portierëve. Ndërkohë, Branko Ivankovic do të emërohet këshilltar special i federatës vendase të futbollit.
Oferta për t’iu bashkuar projektit kanë marrë gjithashtu dy ish-bashkëpunëtorë të Dalicit, Drazen Ladic dhe Vedran Corluka. Nga ana tjetër, Igor Biscanit i është propozuar posti i trajnerit të ekipit kombëtar olimpik U-23, ndërsa vendimi për të pritet të merret deri në fund të kësaj jave.
I lirë mbetet edhe pozicioni i trajnerit të përfaqësueses U-21 të Emirateve. Për këtë arsye, nuk përjashtohet mundësia që edhe ky rol t’i besohet një eksperti kroat.
Emiratet e Bashkuara Arabe mbajnë vendin e 68-të në renditjen botërore të FIFA-s. Përfaqësuesja ka marrë pjesë vetëm një herë në Kupën e Botës, në vitin 1990, ndërsa objektivi është rikthimi në këtë turne në vitin 2030, pikërisht 40 vjet më vonë.
Skuadra iu afrua kualifikimit për Kupën e Botës të këtij viti, por u mund nga Iraku në raundin përfundimtar të eliminatoreve aziatike.
Të gjithë futbollistët e përfaqësueses së Emirateve të Bashkuara Arabe aktivizohen në kampionatin vendas. Një pjesë e konsiderueshme e tyre janë lojtarë të natyralizuar, kryesisht me origjinë braziliane.
