Zhegrovës i rritet vlera, bëhet lojtari më i shtrenjtë i Kosovës

Performancat në fushën e lojës, po i japin frytet e saj edhe jashtë saj.

Edon Zhegrova ka pasur një rritje konstante në formën e tij, gjersa kjo ka bërë që edhe vlera e tij në treg të shënojë rritje.

Zhegrova tregoi paraqitje të mira në sezonin që lamë pas, dhe kështu, vlera e tij është rritur prapë, shkruan “Gazeta Express”.

Kësaj here, sulmuesi kosovar ka arritur një vlerë rekord, në krahasim me lojtarët tjerë kosovar.

Zhegrova vlerësohet me 25 milionë euro, duke kaluar Amir Rrahmanin e Vedat Muriqin, që po ashtu janë paraqitur mjaftë mirë sezonin e sapo përfunduar.

Forma që 25-vjeçari e shfaqi në të gjitha kompeticionet me Lillen, ka ndikuar që të shfaqet interesim i madh për të edhe nga klubet tjera të mëdha evropiane.

Edoni këtë edicion arriti numër dyshifror të golave e të asisteve me fanellën e Lille.

Sulmuesi anësor shënoi 12 gola e dhuroi 10 asistime, në 47 paraqitje në të gjitha garat.

Zhegrova është aktualisht i grumbulluar me kombëtaren e Kosovës, ku të mërkurën mundet përsëri të lë shenja në fushën e lojës.