Udinese ka bërë zyrtar transferimin e Mërgim Vojvodës, i cili do të jetë pjesë e klubit italian pas largimit nga Como. Mbrojtësi i Kombëtares së Kosovës është prezantuar nga friulianët si një lojtar me eksperiencë dhe cilësi për forcimin e prapavijës.
Të lidhura
None found
Futbollisti 31-vjeçar është blerë përfundimisht dhe ka firmosur një marrëveshje deri më 30 qershor 2028. Kontrata parashikon edhe mundësinë e zgjatjes së bashkëpunimit për një sezon shtesë.
Në njoftimin e saj, Udinese thekson se Vojvoda mund të përshtatet në disa pozicione. Ai është në gjendje të luajë në rreshtimin me katër mbrojtës, por edhe si anësor i djathtë në skemat me pesë lojtarë prapa. Klubi vë në pah aftësitë e tij teknike, si edhe gatishmërinë për të dhënë ndihmë në sulm.
I lindur në Llaushë të Kosovës më 1 shkurt 1995, Vojvoda e nisi rrugëtimin në futboll në Holandë, në akademinë e Maastrichtit. Më vonë u zhvendos në Belgjikë, fillimisht te Standard Liege dhe më pas te Sint-Truiden, skuadër me të cilën debutoi në futbollin profesionist gjatë sezonit 2014/15.
Pas kësaj, ai provoi një eksperiencë në Gjermani me Carl Zeiss Jena, për t’u kthyer më pas në Belgjikë. Te Mouscron qëndroi për tri sezone, duke grumbulluar 103 paraqitje dhe dy gola në kampionat e kupë.
Gjatë verës së vitit 2019, Vojvoda u rikthye te Standard Liege, ku pati mundësi të luante edhe në Ligën e Evropës. Një vit më vonë, ai realizoi kalimin në Serie A, duke nënshkruar me Torinon.
Te klubi torinez, mbrojtësi kosovar u kthye në një prej figurave më të rëndësishme të ekipit. Në katër vjet e gjysmë, ai zhvilloi 135 ndeshje në Serie A dhe Kupën e Italisë, teksa shënoi tre gola.
Në janar të vitit 2025, Vojvoda kaloi te Como dhe u shndërrua menjëherë në një pikë referimi për skuadrën e drejtuar nga Cesc Fabregas. Tekniku spanjoll e përdori edhe në pozicione më të avancuara në krah, ndërsa lojtari e përfundoi gjysmën e parë të sezonit 2024/25 me një gol në 11 paraqitje.
Paraqitjet e tij të mira vazhduan edhe sezonin e kaluar, kur shënoi dy herë në 30 ndeshje të Serie A dhe ndihmoi Comon të arrinte një kualifikim historik në Ligën e Kampionëve. Ai dha kontribut edhe në rrugëtimin drejt gjysmëfinales së Kupës së Italisë, duke luajtur në katër takime.
