Thomas Tuchel, përzgjedhësi i Anglisë, deklaroi se nuk mbeti aspak i kënaqur me lojën e ekipit të tij, edhe pse “Tre Luanët” fituan 2-1 ndaj Norvegjisë pas vazhdimeve dhe siguruan kalimin në gjysmëfinalen e Kupës së Botës.
Të lidhura
None found
Vendi mes katër përfaqësueseve më të mira u arrit falë dy golave të Jude Bellinghamit, me të cilët Anglia përmbysi avantazhin e hershëm të norvegjezëve.
Pas sfidës, trajneri gjerman nuk e fshehu pakënaqësinë për paraqitjen e skuadrës së tij.
“Ne ishim me fat”
“Sot ia vështirësuam shumë, shumë punët vetes. Rezultati është fantastik. Jemi në gjysmëfinale, çka është e pabesueshme, por me paraqitjen tonë nuk jemi të kënaqur”, u shpreh Tuchel.
I pyetur se çfarë nuk i kishte pëlqyer konkretisht, ai dha një përgjigje të prerë.
“Në çdo aspekt. Sërish, përkushtimi ishte aty, por mënyra si luajtëm vetëm sa e komplikoi gjithçka për ne. Ishim të pakujdesshëm, bëmë shumë gabime teknike, nuk lëvizëm mjaftueshëm shpejt dhe nuk patëm qëndrueshmëri. Sot ishim me fat”.
“Mos më pyesni për mentalitetin”
Gazetarët e pyetën nëse rëndësia e një çerekfinaleje të Kupës së Botës kishte ndikuar psikologjikisht te futbollistët e tij.
Reagimi i Tuchel ishte i menjëhershëm: “Nuk është çështje mentaliteti. Ky është mentalitet i pastër. Si mund të më pyesni për mentalitetin? Ky është mentalitet i pastër, mund ta paketoni dhe ta shisni”.
Ai nënvizoi se e vetmja çështje ishte niveli i futbollit të shfaqur nga skuadra.
“Problemi është cilësia e futbollit tonë. Kaq. Nuk ka të bëjë aspak me mentalitetin”.
“Do të jemi më të mirë”
Anglia ka kaluar momente të vështira në këtë Botëror. Ajo e eliminoi Meksikën edhe pse luajti me një futbollist më pak, ndërsa hasi vështirësi edhe në raundin e 16-të përballë Republikës Demokratike të Kongos.
Megjithatë, Tuchel është i bindur se ekipi i tij ende nuk ka shfaqur potencialin e plotë.
“Do të jemi më të mirë. Duhet të jemi më të mirë. Por tani është koha të festojmë”, përfundoi përzgjedhësi i Anglisë.
