Shqipëria fitoi 2-0 në shtëpi ndaj Finlandës në xhiron e pestë të Ligës së Kombeve, pas një ndeshjeje ku dominoi lojën.
“Kuq e Zinjtë” e nisën më mirë takimin dhe ndërtuan dy aksione të bukura, por pa arritur t’i përfundonin me gol. Më pas, Finlanda u shfaq e rrezikshme në disa kundërsulme, të cilat Etrit Berisha i ndali me pritje vendimtare.
Të lidhura
None found
Në minutën e 35-të, Ernest Muçi i dha avantazhin Shqipërisë me një goditje të fuqishme nga distanca, që befasoi portierin kundërshtar.
Edhe pas pushimit, Shqipëria mori nismën. Rey Manaj shënoi golin që vulosi fitoren në minutën e 50-të, pas harkimit të Elseid Hysajt.
Situata e Finlandës u rëndua më tej në minutën e 67-të, kur Tenho mori karton të kuq për një ndërhyrje ndaj Muçit.
Me këtë rezultat, Shqipëria mbetet në krye me 12 pikë. Finlanda, e treta me shtatë pikë, do të qëndrojë matematikisht në Ligën C edhe për një sezon.
Në xhiron e ardhshme, Shqipëria do të ndeshet me Bjellorusinë, e cila renditet e dyta me 10 pikë. Një barazim i mjafton skuadrës shqiptare për t’u ngjitur në Ligën B dhe për të siguruar play-offin e Kampionatit Evropian 2028.
