Rodri kërkon nga Fermin Lopez fanellën me numrin 16 pas transferimit te Barcelona

Rodri i ka kërkuar Fermin Lopezit, me të cilin pritet të jetë bashkëlojtar te Barcelona, që t’ia lirojë fanellën me numrin 16.

Mesfushori 30-vjeçar duket gjithnjë e më pranë largimit nga Manchester City gjatë kësaj vere. Ai thuhet se ka zgjedhur Barcelonën, duke lënë pas në negociata edhe rivalin e saj, Real Madridin.

Lajmi për marrëveshjen mes klubeve u bë publik pasi Rodri nuk u përfshi në skuadrën e Enzo Marescas për duelin e Community Shield kundër Arsenalit, të zhvilluar të dielën pasdite. Sipas raportimeve, Barcelona do të paguajë rreth 75.3 milionë euro për transferimin e tij.

Mediumi BBC raporton se zyrtarizimi i marrëveshjes mund të ndodhë shumë shpejt, ndërsa reprezentuesi i Spanjës pritet të firmosë kontratë katërvjeçare me klubin katalanas.

Gjatë ditëve të fundit, Rodri dyshohet se ka diskutuar me Fermin Lopezin edhe për numrat e fanellave. Fabrizio Romano pretendon se mesfushori spanjoll ka kërkuar ta vazhdojë përdorimin e fanellës me numrin 16, të cilën e ka bërë të famshme.

Si rezultat, Lopez pritet të marrë numrin 7, që më herët është mbajtur nga futbollistë si Ousmane Dembele dhe Antoine Griezmann.

Një tjetër numër i rëndësishëm është ai 9, i cili mbeti i lirë pas largimit të Robert Lewandowskit gjatë kësaj vere. Sulmuesi polak e kishte bartur atë fanellë për katër vite, por ende nuk dihet se kush do ta marrë.

Sipas mediumit spanjoll SPORT, Barcelona po e ruan fanellën me numrin 9 për objektivin e saj afatgjatë në afatin kalimtar, Julian Alvarez, emri i të cilit vazhdon të lidhet me një transferim të kushtueshëm te gjiganti katalanas.

I njëjti raportim bën të ditur se Karim Adeyemi, një tjetër përforcim i mundshëm i kësaj vere, tashmë ka shprehur dëshirën për të veshur fanellën me numrin 14.