Roberto Martinez pritet të mos vazhdojë si përzgjedhës i Portugalisë pas mbylljes së Kupës së Botës 2026, pavarësisht se deri ku mund të arrijë kombëtarja në këtë turne, sipas raportimeve më të fundit.
Trajneri spanjoll e ka kontratën të vlefshme vetëm deri në fund të muajit korrik dhe, sipas raportimeve, ai tashmë ka vendosur të mos firmosë vazhdimin e saj. Pas tre vitesh në drejtimin e Portugalisë, Martinez duket i gatshëm të nisë një kapitull të ri në karrierë.
Të lidhura
None found
talkSPORT raporton se 52-vjeçari e ka marrë këtë vendim përpara startit të Botërorit dhe aktualisht po shqyrton mundësitë për një rikthim në futbollin e klubeve. Një aventurë e re në Ligën Premier mbetet e mundshme, ndërsa emri i tij është përmendur edhe për disa role të rëndësishme në futbollin evropian.
Nuk përjashtohet as skenari që në të ardhmen ai të marrë drejtimin e një kombëtareje tjetër.
Gjatë kohës së tij te Portugalia, Martinez ka kaluar momente me rezultate të ndryshme. Portugezët u ndalën nga Franca në çerekfinalen e Euro 2024 pas goditjeve të penalltive, por më pas reaguan në mënyrë mbresëlënëse duke mposhtur Spanjën në finalen e Ligës së Kombeve verën e kaluar.
Objektivi i tij tani është ta përfundojë sa më mirë eksperiencën në stolin e Portugalisë, me synimin për t’i dhuruar vendit trofeun e parë të Kupës së Botës në histori.
Martinez ka përvojë edhe nga dy edicione të Botërorit me Kombëtaren e Belgjikës. Në vitin 2018 ai i çoi belgët deri te vendi i tretë, ndërsa katër vite më pas pësoi një zhgënjim të madh me eliminimin që në fazën e grupeve.
Portugalia shihet si një prej skuadrave favorite për triumfin në Kupën e Botës 2026, falë një përbërjeje me shumë yje dhe cilësi në çdo repart të fushës.
Fushata e tyre në turne do të hapet me ndeshjen ndaj Kongos, ndërsa në Grupin K do të përballen edhe me Uzbekistanin dhe Kolumbinë.
