Teksa Kupa e Botës 2026 po zhvillohet në kulmin e saj, tifozët vijojnë të shtrojnë pyetje të ndryshme për fanellat e përfaqësueseve pjesëmarrëse.
Gjatë këtij turneu, që luhet në SHBA, Meksikë dhe Kanada, shumë mbështetës kanë dalluar elemente të veçanta në uniformat e futbollistëve. Një prej tyre është emblema e artë e “Këpucës së Artë”, të cilën e mbajnë tre lojtarë – Harry Kane, Kylian Mbappe dhe James Rodriguez – si tregues se e kanë fituar këtë çmim në edicione të mëparshme të Kupës së Botës.
Të lidhura
None found
Në të njëjtën kohë, përfaqësueset që e kanë fituar më herët këtë garë – Argjentina, Uruguai, Gjermania, Brazili, Anglia, Franca dhe Spanja – paraqiten me logon e turneut në ngjyrë ari. Skuadrat e tjera përdorin variantet bardh e zi të logos, sipas ngjyrës së fanellës.
Një tjetër detaj që ka zgjuar interes është ngjyra e uniformave të disa kombëtareve. Shumë tifozë kanë pyetur pse disa ekipe luajnë me ngjyra që nuk përputhen me flamujt e tyre zyrtarë.
Një nga rastet më të përfolura është Gjermania, e cila tradicionalisht zbret në fushë me fanellë të bardhë dhe elemente në të zezë, të kuqe dhe të verdhë. Edhe pse këto tri ngjyra janë pjesë e flamurit gjerman, e bardha, që mbizotëron në fanellë, nuk gjendet në të.
Shpjegimi vjen nga historia. Gjermania luan me fanellë të bardhë sepse kjo ishte ngjyra e flamurit të Prusisë, një shtet historik gjerman që dikur shtrihej nga kufijtë e Rusisë së sotme deri në Francë.
Prusia ishte fuqia kryesore në bashkimin e Gjermanisë në vitin 1871, por u shpërbë zyrtarisht në vitin 1947 pas Luftës së Dytë Botërore. Sot, territoret e saj janë pjesë e disa shteteve moderne, mes tyre Gjermania, Polonia, Rusia dhe Lituania.
Ngjyrat bardh e zi ishin po ashtu pjesë e identitetit të Perandorisë Gjermane, e cila bashkoi ngjyrat e Prusisë me ato të Lidhjes Hanseatike për të krijuar kombinimin e njohur bardh, zi dhe kuq.
Kur u krijua për herë të parë kombëtarja gjermane e futbollit, ajo vendosi të luante me ngjyrat bardh e zi të flamurit prusian. Edhe pasi Mbretëria e Prusisë u shpërbë vite më vonë, përfaqësuesja zgjodhi ta ruante këtë traditë.
Flamuri i Prusisë kishte gjithashtu një shqiponjë të zezë, simbol që vazhdon të jetë i pranishëm edhe sot në stemën shtetërore të Gjermanisë dhe në emblemën zyrtare të kombëtares.
